SIBU: Kaban Kunsil Nengeri (ADUN) Tamin Datuk Joseph Mauh anak Ikeh nyuaka bantu RM10,000 ngagai peranak Rh Lichai Pusong, Sungai Tepus, Ulu Balingian, ke dituntung penusah angus, bedau lama ke udah.
“Bantu tu ari Palan Servis Rayat DUN Tamin, iya nya RM8,000 dikena meli atap seraya laluh kena meli barang bukai ke beguna baka beras,” ku Mauh.
Penatai iya disempulang Pemancha Robert Nanta, Kaunsilor Timothy Takin enggau Kaunsilor Mathew Ganggang.
Mauh madah iya deka berunding enggau Opis Menteri Pengawa Berumah bekaul enggau lun kena mantu ngaga baru rumah panjai sida.
Kena 18 Feb, api udah nganguska 16 pintu bilik Rh Lichai Pusong, ti ngujungka 96 iku peranak rumah panjai nya semina mengkang gari ba punggung.
Mauh madah bantu mata duit enggau barang bukai udah disua sebedau tu.
Tandu iya, Menteri ba Opis Menteri Besai Datuk Joseph Entulu mega udah nyuaka bantu RM1,600 ari Palan Servis Rayat Selangau.
Kompeni enggau raban NGO mega bisi mantaika penyinu ati sida ngagai peranak Rh Lichai kena ngelempungka tating pemerat ke ditapi sida ketegal penusah angus nya.
Beduduk enggau nya, Mauh ngelalau peranak tumah panjai bejejimat maya berapi nyerumba musin kemarau tu.
Ku Mauh, maya berapi enti ulih anang ninggalka dapur nangika utai panduk angus ti ngunjungka api nyerarai lalu nganguska rumah.
“Kaban Komiti Pemansang enggau Pengelikun Rumah Panjai (JKKK) patut ngulihka penemu bekaul enggau pengelikun kena nyeliahka penusah angus nyadi,” ku iya.