KUCHING: Muzik nunjukka identiti sesebengkah bansa ti patut diintu tauka ditan sereta diidup tauka ditegapka agi.
Menteri Pemansang Rama, Tan Sri William Mawan Ikom madah, beduduk ari nya bemain muzik asal baka sape patut dipelajarka rebak baru.
Kelimpah ari ti nyadi pemerindang rebak baru ke lalu ulih nyeliahka ari ngereja pekara ti enda manah.
“Aku meransang orang mayuh ukai semina ngintu tauka ngetan sereta ngidup tauka ngenegapka aja sesebengkah muzik, laban muzik mega baka sape nunjukka identiti bansa Orang Ulu,” ku iya.
Mawan mansutka pekara nya lebuh ti bejaku ba pengerami bejadika Borneo Legacy Centre (BLC) di Lasan Denak ke dikeempu Dr. Elli Luhat ditu, pagi kemari.
Dulu ari nya Mawan dibai Dr. Elli bejalai ngabas sereta beratika produk ti bisi disediaka dalam BLC nya.
BLC ukai semina sebengkah akademi ke alai endur belajar bemain sape aja tang mega nyengkaum palan endur belajar nanam kayu Gaharu enggau Tongkat Ali sereta nupi ikan empurau.
“Orang mayuh ke ukai semina raban bansa kitai Dayak ke deka nemu silik pasal nanam kayu Gaharu, Tongkat Ali, nupi ikan empurau enggau belajar bemain sape, semua nya bisi ba BLC ditu,” ku iya.
Dulu ari nya dalam jaku pengelalu Dr. Elli madahka BLC udah diperambu sereta dipejalaika pengelama 10 taun ke udah.
Ku iya, tuju iya numbuhka palan nya dikena ngetanka pesaka asal nyengkaum utai tumbuh enggau utai idup, adat enggau main asal.
Lebuh ti ngenang Akademi Sape ke ditumbuhka iya ba palan nya madahka ulih meri peransang ngagai ngagai orang ti deka belajarka muzik nya.
Iya bepenemu bemain sape ulih nyeliahka orang seseiku lebih agi raban nembiak ati ti ngereja pekara ti enda meruan.
“Muzik sape amat manah didinga sereta semak enggau bansa enggau orang bukai.
“Sape ulih meri peransang ngagai runding sereta terapi ngagai kitai lebih agi ngagai raban nembiak, kelimpah ari ti nyeliahka ari ngereja ulah ti enda manah,” ku iya.
Dalam BLC Dr. Elli mega bisi nyendiaka Program Nyemilik, palan endur betangas tauka ‘spa’ ngena herba tongkat ali, gaharu sereta belian.
Penerang silik pasal BLC tau dipeda ba website : drlihattechomogy.com.