SIBU: Lebih 20 iku peranak rumah panjai di kandang endur Sungai Rassau, Batang Igan udah ngaga ripot polis lepas nawa sida kena tipu seiku penagih utang sebuah kompeni ditu pagi kemari.
Ku penerang, seiku lelaki ke kala gawa di kompeni francais nya ngagai rumah panjai nuntut bayar kena 7 Februari tu tadi.
Sebedau tu, dianggarka lebih 20 iku peranak dia ke beumur dalam kandang 20-an ngagai 60-an di rumah panjai nya bebelika mayuh bengkah barang ngena chara lun ari kompeni francais nya.
Dianggarka genap iku sida ke ngaga kumpelin nya mayar RM100 ngagai RM300 penyampau bayar lun sida ngagai lelaki nya.
Tang kena 20 Februari tu tadi, kompeni francais nyebut sida bedau mayar pupuk bulan nya.
Iran ati meda pengawa ke digaga kompeni nya agi minta bayar pupuk bulan nyin tadi, semua peranak ke udah mayar madahka ngagai kompeni bisi seiku pengereja pengawa datai ngambi bayar ari sida sebedau tu.
Enda lantang ati, dia menijer kompeni nya madahka ngagai peranak dia pengereja pengawa nya udah ngetu gawa enggau kompeni nya kenyau ari ujung bulan Januari tu tadi.
Irau ati duit udah kena tipu, lebih 20 iku peranak di rumah panjai nya mansang ngagai balai Balai Polis Sentral ngaga ripot bekaul enggau kes nya kemari.
Kes nya benung kena tasat polis.