Penginjau dilalau nginjau duit ari PPW ke belisin ngambika semua sempekat nyata sereta nitihka atur
KUCHING: Lebih 400 kompeni ti nyendiakka duit jali di nengeri tu deka diperesa ngambika enda ngelanggar atur ti udah ditetap dalam Akta Pemberi Pinjam Wang (PPW) 1951, Akta 400.
Superitenden Pengawa Tasat enggau Tuduh Unit Penyali Wang /Pemegai Pajak Gadai (BPWG) Pampang Sarawak, Zayadi Sebeli madah pengawa nya dikena nentuka orang ke nerima duit jali enda ditipu lalu diintu nitihka pematut.
Ku iya, dalam timpuh taun 2012 nyentuk ngagai bulan Februari 2014 penyampau 23 iti sebana ari mensia mayuh ti nuduh sida dichaj bungai ngelui ari patut bisi diterima unit nya.
“Nitihka Akta PPW, bungai ditetap ba ikas 1.5 peresin sebulan tauka 18 peresin setaun lalu kompeni PPW enda tau ngelanggar atur nya.
“Kompeni mega patut ngerjister pom ‘J’ sereta orang ke nerima duit jali patut nyimpan siti salin surat sempekat jali,”ku iya.
Zayadi mansutka penerang tu ba siti aum pengarang berita ke diatur di ringkat tujuh Begunan Binamas, Jalai Padungan ditu, kemari.
Kelimpah ari nya, iya ngansak mensia mayuh ti deka nginjau duit patut napat kompeni PPW ke belisin ngambika semua sempekat ke disedia terang sereta nitihka penetap.
“Nengah chara tu kitai nemu pekara ti ditetap ba dalam sempekat. Kitai mega nemu penyampau bungai sereta timpuh bayar,”ku iya.
Enti udah kena tipu lalu enda nyimpan sebarang salin surat sempekat nginjau duit, pekara tu pedis dipechara ba kot, tandu iya.
Bepelasarka pansik ti dipejalai, Zayadi madah orang ke beumur 18 taun ti baru berengkah kereja suah agi deka nginjau duit ari kompeni PPW.
Taja pia, iya nyangkal tuduh dia sekeda orang nginjau bisi udah dipejal raban ari PPW tauka ‘Ah Long’.
Ba kaul ke sama, Zayadi madah pengawa matau nya deka mega dipejalai ba kedai pajak gadai lalu diadu enggau tuju ke sama.
“Semina kedai pajak gadai ke belisin aja dikemendar bejalaika pengawa nyali duit nengah atur begadai emas.
“Kedai emas enda dikemendar bejalaika servis pajak gadai lalu kitai deka meresa tiap kedai ngambika sida enda ngelanggar Akta Pemegang Pajak Gadai 1972 (Akta 81),”ku iya.
Iya madah dua kompeni di Lawas enggau Bintulu udah diukum RM1,000 ketegal ditemu ngelanggar akta nya.
“Atur matau kompeni PPW enggau kedai pajak gadai deka dipejalai ngenyit ba sereta menua,”ku iya.