KUCHING: Kelimpah ari mantu ruang bilik ke seranta enggau orang ke kurang benasit, Hope Place mega mantu raban pengasih ke bukai.
Pemungkal sereta volenter Hope Place nyuaka bantu tepung tusu ngagai prinsipal Pusat Jagaan Kanak-Kanak D’wira Siew Moi.
Pusat Jagaan Kanak-Kanak D’wira, ke ba Sky Garden, ditumbuhka dikena meri pelajar sekula ngagai nembiak ke kurang benasit. Tebal ari nembiak ke besekula dia nya datai ari ruang bilik ke seranta, sekeda nya nadai ngembuan surat beranak ngujungka sida nadai ulih besekula ba sekula perintah.
Bayar tuisyen semina RM20. Taja pan mayuh sida enda tebayarka penyampau nya, pusat nya agi ngemendarka sida belajar dia.
Pusat nya meri sida pemakai sekali sehari setegal sida datai ari ruang bilik ke seranta. Nyadi awakka sida tau berapi, keba nya begunaka minyak makai, garam enggau gula.
Seiku pengajar ba sekula nya nyebut mayuh ari nembiak dia begunaka tusu, nya kebuah sida beguna bekal tusu ke enda peputus.
Maya ke diatu sekula nya bisi lebih ari 70 iku nembiak sekula.
Hope Place mega mantu 80 ruang bilik ke seranta. Orang mayuh dikelalu meri utai pakai tauka pemeri bukai dikena sida neruska pengawa pengasih.
Hope Place tau disambung nengah lumur 013-5672775 ari jam 8.30 pagi – 12.30 ngalih hari Hari Satu ngagai Hari Lima.