KUCHING: Chairman DAP Menua Chong Chieng Jen bisi madahka parti sida iya nyanggup bekerejasama enggau Kepala Menteri baru, Tan Sri Datuk Amar Adenan Satem.
Ku Chong, sigi udah nyadi pemerat parti sida iya deka bekerejasama enggau Perintah Menua bepelasarka sama rata, sereta adil lalu meri penguntung ngagai menua tu.
Tang taja pia, Chong madah semina siti aja pekara ke enda ngelantangka ati, iya nya pangku pengawa Menteri Wang, Menteri Pengintu Pemisi enggau Rampa Menua, nyengkaum portfolio Kepala Menteri agi ba pangku pengawa seiku menteri.
“Ba runding aku, pangku pengawa tu berat endar kelebih agi Menteri Wang. Barang pejalai denokratik ke manah begunaka pangku pengawa kepala menteri nya enggau menteri wang patut enda digaga pegai seiku orang aja.
“Kebuah iya bansa nya, ngambika bisi sistem meresa enggau nimbang,” ku Chong, ti mega nyadi Kaban Parlimen (MP) Bandar Kuching enggau ADUN Kota Sentosa madah ba aum media bedau lama ke udah.
Ba pemerat ke deka dipeda digaga ulih Adenan ku iya, iya nya minta Adenan mansik baru perambu ngaga Indu Opis Sarawak Economic Development Corporation (SEDC) enggau Opis Land Custody and Development Authority (Pelita) di The Isthmus.
Iya madah, penyampau belanja ke dikena ngaga kededua opis nya nyau manggai RM146 million ari simpan Perintah ngaga kededua indu opis nya, laban ku iya, Pelita enggau SEDC udah bisi indu opis sida iya empu lalu nambah opis ke alai Opis Tanah enggau Survei ke diatu baka ke enda mayuh dikena.
“Penyampau RM146 million nya tau disimpan kena ngaga pengawa nyambung karan sereta ngemansangka menua pesisir. Kelimpah ari nya, iya mega ulih dikena ngaga sistem pengangkut di Kuching. Nyangka dalam sehari dua tu ila, kami deka nganjung surat ngagai Adenan meri perambu ke silik agi baka ngaga sistem pengangkut di Kuching,” ku iya.
Lebuh ditanya enti sekali tu laban Kepala Menteri udah beganti, nyangka kerejasama iya enggau Adenan deka nyadi manah agi, ku Chong:
“Aku bedau deka nimbal dulu, laban iya (Adenan) baru dua hari masuk opis. Sigi penemu DAP ngelama tu, kami deka bekerejasama enggau Perintah taja kami tu penyakal,” ku iya.
Ba siti agi tanya enti komuniti China deka mulaika diri nyukung BN udah Adenan mangku pengawa nyadi Kepala Menteri, Chong madahka:
“Nya bepanggai ba polisi ke digaga Adenan. Seagi-agi Umno agi nyadi orang ke ngaga polisi, sereta seagi-agi BN agi nunda gaya politik UMNO, ukai semina China aja ke enda nyukung BN, bansa India baka nya meh.”
Kelimpah ari nya, Chong madahka DAP deka mantu PKR enti parti nya begunaka bantu sida iya ba pengawa bepilih mit Balingian ila, puang diatu berindik ari Taib nyau mangku pengawa nyadi Tuai Pemegai Menua.
“Pengawa nya kami nyerah ngagai PKR bakani ku sida iya ngaga perambu deka bekimpin lalu kami deka mantu sida iya,” ku Chong.