Empat iku ari kaban G5 dipilih nyadi pengari rayat PRN ila bepanggai ba pemutus Chairman BN
KUCHING: Sekalika empat iku ari kaban G5 ke udah diterima baru Parti Demokratik Progresif Sarawak (SPDP) dichalun tauka enda maya Pengawa Bepilih Nengeri (PRN) ila, nya bepanggai ngagai Chairman Barisan Nasional renggat perintah besai enggau nengeri.
Pekara nya dipadahka Presiden SPDP Tan Sri William Mawan Ikom lebuh ditanya sekalika parti meri peluang ngagai empat iku nya nyadi pengari ba PRN ila.
Empat iku raban G5 ti diterima baru nyadi kaban SPDP iya nya Datuk Peter Nansian ti nyadi Kaban Kunsil Nengeri (ADUN) Tasik Biru; Datuk Sylvester Entri Muran (ADUN Marudi); Paulus Palu Gumbang (ADUN Batu Danau) enggau Rosey Yunus ADUN Bekenu.
Taja pan aku ingin bendar madahka baka nya, lalu nya meh kebuah aku mai sida tama baru dalam parti laban sida ti nyadi pengari rayat sereta sida bisi penyukung, tang semua tu politik lalu bepanggai ngagai macham mekanisme, hirarki pemutus, ku Mawan.
“Pasal tanya nya, aku enda ulih nyaut laban nya siti pemutus ke semina Chairman BN renggat besai enggau nengeri nentuka.
“Aku semina ngemuntangka pemulai, ngulihka pemendar ari semua Majlis Tertinggi parti. Nerima sida baru sereta minta iring ari ketuai BN enggau perintah lebuh mutarka penanggul ke nyadi dikena ngenegapka parti enggau BN.
“Pasal pengari nya, taja pan aku bisi deka ke orang seseiku lebih agi raban empat tu, tang semua nya patut bepanggai ngagai Kepala Menteri (Tan Sri Datuk Amar Adenan Satem) enggau Menteri Besai (Datuk Seri Najib Tun Razak),” ku iya.
Mawan dikerandau pengarang berita ditu kemari pengudah bejadika Borneo Legacy Centre (BLC) di Lasan Denak ti dikeempu Dr. Elli Luhat.
Kepala Menteri Tan Sri Datuk Amar Adenan Satem dalam riput surat kabar lebuh ti nerima penemuai basa ari SPDP lebuh ditanya pekara ti sama mega madahka pekara nya diputuska dudi.
“BN milih pengari ti enda ngira sitak iya pengari ke ulih menang,” ku Adenan.
Nambahka nya lebuh ditanya bekaul enggau sekeda pampang parti ti enda nyukung pemulai sida empat nya laban ngeruga penyikap sekeda kaban ti bisi juluk deka nyadi pengari, Mawan madahka, pekara ti baka nya endang disadang tang pengujung iya sida deka nitihka singkang kitai.
“Kitai enda ulih nunda pengasai ati lebuh deka mutarka penanggul. Aku mega bisi pengasai ti baka nya laban aku mega mensia.
“Tang semua nya mesti diseliahka lalu diganti enggau penemu ti rasional laban kitai mesti berundingka pekara ti patut diputarka.
“Bisi orang endang mantah tang nya ulah kitai mensia tang sida chukup pintar meretika pekara ti nyadi,” ku iya seraya madahka empat iku nya diterima asil ari pemutus semua Majlis Tertinggi parti ke nyengkaum sapit iya Datuk Seri Tiong King Sing.
Iya madahka parti (SPDP) enda tau enda meri peluang lalu enti enda ngena peluang enggau manah, peluang ke baru mega patut diberi.
Taja pia iya madahka diri arap bendar empat iku nya (ari G5) bebendar sereta nadai bechiping lebuh ti diterima baru nyadi kaban parti.