KAPIT: Urung 2,186 penerima Bantu Rayat 1Malaysia (BR1M) 3.0 sitak Baleh udah nerima baucher BR1M3.0 sida ke diatur ba Stadium Bletih, apin lama.
Pengawa nyuaka bantu nya udah dikemujurka Menteri Pemansang Tanah Tan Sri Datuk Amar Dr James Jemut Masing.
Masing madah, perintah udah nyendiaka urung RM4.6 juta ungkup taun 2014 ba tuju nya dikena ngelempungka tating pemerat kelebih agi ngagai rayat ke kurang penatai pemisi baruh RM3,000 sebulan.
“Di Sarawak aja bisi 594,765 penerima lalu ba Kapit 21,655. Bisi 4,668 iku penerima nerima bantu sida nengah akaun bank seraya laluh nerima ngena baucher,” ku Masing.
Berindik ari nya, Masing ngelalau bala penerima nguna bantu nya enggau manah sereta enda ngeruwak duit nya enggau meli utai enda menuku.
“Duit BR1M tu diberi perintah Barisan Nasional (BN) dikena ngelempungka tating penusah rayat ari sukut belanja ketegal sabsidi barang udah dibatak pulai. Nya alai, aku ngarapka duit tu, dikena meli barang ke patut lalu enti ulih simpan ba bank ngambika bisi ke dinding bulu jemah,” ku Masing ke mega ADUN Baleh.
Sama bisi datai ba pengerami nya Kaban Parlimen (MP) Hulu Rajang Wilson Ugak Kumbong, Residen Kapit Fedrick John George, kededua Sapit Residen; Joseph Ikan enggau Zul Usop, Pemesai Opis Pelilih Mit Menua Kapit Elvis Didit, Walikota Opis Kaunsil Kapit (MDK) Philimon Nuing, Sekretari MDK Yong Ing Chu, Pemancha Dato Sri Tan Kian Hoo, bala tuai raban bansa enggau pemesai opis perintah sereta sida ke bukai.