Anda di sini

Nama pengari BN DUN Balingian digerah sebedau pengawa ngantung nama

Advertisement

KUCHING: Nama pengari Barisan Nasional (BN) ba Pengawa Bepilih Mit (PRK) Kunsil Nengeri (DUN) Balingian deka dipadahka beberapa hari sebedau pen­gawa ngantung nama diatur, pia ku Kepala Menteri Tan Sri Datuk Amar Adenan Satem.

Kemari, Komiti Pengawa Bepilih (SPR) madahka pengawa ngantung nama PRK DUN Balingian deka dipejalaika kena 17 Mac lalu hari muai undi 29 Mac 2014.

Adenan ti nyadi Chariman BN Nengeri madahka aum pasal pekara nya deka dik­erandauka enggau kaban parti.

“Kami bedau ngemutuska sapa bagi pengari nya, tang deka ditentuka enda lama agi lalu dipadahka beberapa hari sebedau pengawa ngantung nama, ngambika pengari nya ulih nyikap diri.

“Beberapa nama bisi udah dianjung ngagai aku, enda lama agi aku deka berandau enggau ketuai kanan parti bekaul pekara nya (pen­gari).

“Taja pia kami diatu endang udah nyikap diri betapi enggau PRK Dun Balingian nya, sereta arap bendar ulih ngetanka sitak nya bepelasarka sejarah,” ku iya seraya madahka pengari nya endang peranak menua nya.

Adenan mansutka pekara nya dalam aum penga­rang berita lebuh dipinta ngenang pasal PRK Dun Balingian, pengudah nerima penemuai basa ari raban Parti Demokratik Pro­gresif Sarawak ti diketuaika presiden iya Tan Sri William Mawan Ikom.

Iya madahka timpuh 12 hari ke diberi SPR endur bekimpin endang chukup.

Kelimpah ari nya lebuh ditanya bekaul enggau parti penyakal bisi ati deka ngan­jung pengari, iya madahka, menua tu menua demokrasi, sesapa ulih nganjung pen­gari.

“Nya bepanggai ba sida (parti penyakal), enti sida deka nganjung pengari nya sebarang ku sida,” ku iya.

Sitak DUN Balingian dikusungka Pehin Sri Ab­dul Taib Mahmud ke ny­adi Kaban Kunsil Nengeri (ADUN) nya kena 28 Feb­ruari tu tadi, berindik ari iya dichirika nyadi Tuai Pemegai Menua (TYT) Ketujuh.

Advertisement