SIBU: Persidangan Tahunan Iban Sarawak (SIAC) Gerija Methodist Iban kemari nerima sebuah van diberi seiku orang dagang tebilang Dato Yii Ching Siew.
Pengerami nyuaka van nya diatur ba Gerija Methodist Iban Sarawak di Jalai Fong Ming.
Presiden SIAC Gerija Methodist Iban, Reverend Steward Damat berasai gaga ati ketegal bisi van ngambika ulih dikena ngereja pengawa gerija.
“SIAC Gerija Methodist Iban meri besai terima kasih ketegal pemanah ati Dato Yii Ching Siew meri sebuah van keguna aktiviti gerija.
“Pemeri nya chukup besai reti ngagai SIAC Gerija Methodist Iban ke nyambut ulang taun ke-65 taun nyin tadi,” ku iya.
Dalam jaku ngelansa iya, Yii mega beterima kasih laban diberi peluang nyerahka van lalu ngarapka SIAC Gerija Methodist Iban ulih ngena van nya bejalaika pengawa gerija sida.
“Terima kasih ngagai Tuhan. Terima kasih meri peluang ngagai aku pulai ke Sibu, menua asal aku sepengudah 55 taun ninggalka bandar Sibu.
“Terima kasih mega laban udah meri peluang ngagai aku nyerahka van tu ngagai SIAC Gerija Methodist Iban,” ku iya.
Sama bisi datai Pengarah Pelajar Keristin SIAC Gerija Methodist Iban, Pastor Lau Lee Lam.