KUCHING: Nitihka penerang ke diberi Opis Menteri Wang, urung tujuh belas ribu (17,000) iku rayat Malaysia ditetapka enda ulih nerima BR1M.
Sebedau tu sida tu terima, tang diatu enda nerima agi, tu mandangka pemisi ruang bilik manah tauka udah nambah.
Kaban Parlimen Santubong ti mega nyadi Sapit Menteri Dalam Menua (KDN) Datuk Wan Junaidi Tuanku Jaafar madah tu mandangka aktiviti ekonomi Perintah mantu sida ke kurang penatai pemisi masuk dalam pengawa dagang, pengelandik, pengawa latih, pelajar udah mujur dipejalaika .
“Tu mandangka program ke digaga perintah deka ngemansangka rayat Malaysia awakka mayuh peluang ungkup sida nyungkak penatai pemisi.
“Ari sukut bukai, iya tau nyadi pemisi ke ngangkatka ekonomi menua di tiap pekara. Ari sukut BR1M, iya ngangkatka pengawa rama sereta ekonomi rayat.
“Anang semina ngenatka diri nadai begiga pengawa lalu nganti bantu perintah belama, kitai patut terus ngemansangka komuniti kitai empu ari sukut pelajar, pengelandik enggau ekonomi kitai empu ngambika menua kitai terus maju ,” ku iya.
Iya madah baka nya lebuh bejaku ba atur pengawa Nyuaka Baucher BR1M di Dewan Perbadanan Produktiviti Malaysia di Demak Laut ditu, kemari.
Iya madah enti diperatika diatu ari sukut penyeranta , kitai beratika udah mayuh pemanah ulih japai.
“Pemujur tu nadai mida orang ke diau di mengeri tauka menua pesisir .…Sama-sama dikemansangka. Tang enti kitai merati menua bukai, Indonesia ngembuan ekonomi ke manah tang orang di menua pesisir sida iya enda ulih dibantu lalu baka nya mega orang di India, ekonomi niki, tang penyeranta di India agi tebal nya lebih setengah biliun orang ensekin laban nadai polisi mantu orang menua pesisir.
BR1M dibagi ngagai tiga bengkah, iya nya keterubah iya sida ke ngembuan pemisi ke kurang ari RM3,000 ke baruh (bulih BR1M 650), sida ke ngembuan pemisi RM3,001 ke atas (bulih RM450) lalu orang bujang tauka bedau belaki tauka bebini ke berumur 21 taun ke baruh bulih RM300.
Kelimpah ari nya iya madah dalam tiap pemeri BR1M bisi disengkaum sekali enggau insurans.
Ba aum media nya mega, Wan Junaidi madahka pengawa deka ngemansangka sitak Santubong entara hab dagang temuai tebilang di Sarawak ulih di keamatka enggau sukung ari Kepala Menteri (KM) Tan Sri Datuk Amar Adenan Satem.
Iya madah pengawa dagang temuai di sitak nya mayuh peluang dikemansangka laban iya ngembuan pengeraja rampa menua kelimpah ari produk eko-dagang temuai.
“Semua orang nemu Santubong sigi kaya dalam rampa menua, lalu iya ulih nyadi hab tebilang aba pengawa dagang temuai di Sarawak.
“Pelaba aku enti iya ulih dikemansangka, iya mega deka ngemansangka perengka guna enggau sosioekonomi rayat ke diau di sitak nya,” ku iya lalu nambah, iya deka betemu enggau Adenan ti mega nyadi ADUN Tanjung Datu, bejuraika pekara nya enda lama agi.
Sama bisi nguluka atur pengawa nya kemari, Kaban Kunsil Nengeri (ADUN) Pantai Damai Dr Abdul Rahman Junaidi, enggau ADUN Demak Laut Dr. Hazland Hipni.