TAT ATI: Semengat tinggi ari bansa Berawan di Long Terawan enggau ADUN Marudi Datuk Sylvester Entri ba pemendar sida ke udah ngangkatka diri ari dua kali angus dalam kandang 23 taun.
ENDA KENA ANGUS: Lumpung rumah panjai ke enda kena tegu api.
BANTU: Meresa gaya utai, Entri (tiga kiba) nguji ngeraup piak ke bekaul ngambika bisi mantu mansa angus ngaga rumah sida baru.
MIRI: Taja pan balat ditinggang penusah kena Hari Tiga tu tadi tang bansa Berawan ari Long Teran, Ulu Tinjar enda putus asa lalu sedia angkat baru ari amau bekau ari penusah angus ke nuntung kedua kali dalam timpuh 23 taun.
Seraya serata rumah panjai nya agi meruan ngingatka pemerinsa ke ditapi 165 iku peranak rumah 44 pintu minggu nyin tadi kena 26 Feb ,Tuai Rumah enggau ex-Gerak Am Francis Ubi nyengut bendar ba ati ke pengerugi ke ninggang iya empu pia mega redak ke di baruh pegai iya.
Api ngelekai jampat di rumah panjai ke digaga ari kayu ditambah enggau pemalat puput ribut udah ngeretungka lumpung rumah panjai ke pengabis panjai ditu dalam beberapa minit aja, ninggalka pengerusak ke enda nemu pemalat.
Taja pia, iya agi meri semengat ngagai redak ngambika sida enda putus asa beugaka rumah baru.
Pengerusak ke dipeda kira empat jam pejalai ngena kerita nengah jalai belakin enggau kayu batang nya enda nemu alai nyema tang peranak di Long Teran ngembuan pengering ati ulih ngangkat diri empu.
Tuai Rumah Francis Ubi beterima kasih ngagai perintah enggau pengari rayat, orang ke meri utai ari rumah panjai ke bekelingi dia, gerija enggau raban NGO ke meri mayuh bengkah macham bantu ari Miri nyentuk ke Baram ngambika ngelempungka tating penusah ke ninggang sida ke tasah.
Tuai rumah nya benung begigaka lon ungkup berumah ari perintah nengeri enggau bungkur insurans ungkup rumah panjai ke deka digaga baru, belajar ari peneleba keterubah menya kira 23 taun ke udah enggau 26 Feb taun tu tadi.
Pengerugi sekali tu balat disepi bala redak dia setegal tebal ari sida benung ngeringak gawa di kebun tauka tempat alai sida gawa ba ladang sawit, kompeni batang tauka di bandar.
Bantu udah majak datai ari rumah panjai ba kandang endur dia bisi nya ngenyauh Bakong ke alai anak belanja dipegumpul ungkup mansa seraya orang seseiku enggau kompeni mega enda tinggal ari sama bela naka alah ngelempungka penusah.
Bantu nya ngaum berau, duit, gari enggau utai bukai ulih orang ke besemak dia seraya Samling nganjung piko mantu ngupas utai dia kelimpah ari meri duit tunai.
Komiti nudukka rumah panjai baru betuaika Penghulu Patrick Jelaman ari rumah panjai nya mega deka ditumbuhka dikena betatika pengawa begumpulka duit enggau projek ngaga rumah baru.
Beberapa jam pengudah penusah nya nyadi kena 26 Feb, ADUN Marudi Datuk Sylvester Entri Anak Muran jampat nganjung 44 tung ges enggau dapur sereta berau ngagai sida ke tasah seraya 44 tung ai mega dianjung hari siti ke nangkanka nya.
Tuai rumah beterimakasih ngagai Entri setegal udah nguji mantu mensia mayuh ke meri servis ngagai rayat sitak di baruh pegai iya maya tuntung penusah enggau maya lantang.
“Dalam penytuntuk baka ke diatu kena tinggang penusah api, perintah nengah engari rayat Datuk Entri engauu MP Baram udah sama-sama enggaurayat ngelempung tating penusah enda sebaka enggau penyakal, kami deka malas pemanah sida atai ba maya ke patut,” ku iya.
Bisi datai ba atur pengwawa nya mega Mohammad Asree Kamri ari Opis Menteri Pemansang Kandang menua enggau menua psisisir, kaunsior enggau mansa angus Thomas Paran, pengari opsi-opis perintah enggau ejensi, tuai-tuai raban bansa, Samling enggau raban ke tasah.
“Kami deka mantu ba pengawa berumah penyampau RM50,000 ungkup sida ke tetangkupka kriteria sida ke minta,” ku Asree ba tempat penusah nya.
ALAI NGENDUH DULU: Tempat alai ngenduh digaga sida ke tasah.
BESEKUT: Seraya bisi nya tinduk ba tanah enggau jalai semin maya malam, empat iku bepadat dalam langkau kain.