PATUT DIKEMERAT: Ichikawa nerangka pansik pemindah raban nembiak ke mengeri ti meri pangka besai di menua pesisir.
KUCHING: Dikena nyeliahka pemunas peranak menua pesisir lebih agi rebak nembiak baka di Jepun ti nyadi di Malaysia, sebengkah pansik dipejalaika Dr. Ichikawa Masahiro ari Fakulti Betanam Betupi, Universiti Kochi, Jepun.
Nitihku Ichikawa, pansik nya diberi nama ‘Possible Degradation of Rural Areas due to Depopulation and Aging in Sarawak: Examination based on Similar Observations made in Rural Areas in Kochi, Japan’ dikena mandingka gaya utai di menua pesisir di Sarawak diatu, lalu Miri nyadi palan endur bejalaika pansik enggau Kochi di Jepun.
Ku iya, pemansang Malaysia amat jampat ti mega nyadi di Jepun lalu dipelaba tau nyadi ditu.
“Tuju aku ti bejalaika pansik lalu ditampung licha tu dikena mansik sereta ngenukuka peranak di nengeri enggau menua tu ulih nemu pekara ti nyadi di Jepun diatu.
“Pangka ari pemansang ti nadai betatak sereta jampat nyadi kebuah bala nembiak mayuh pindah ngagai mengeri.
“Pemindah nya ketegal beberapa kebuah baka ngiga peluang gawa ti begaji besai dibandingka enggau di menua pesisir,” ku iya lebuh meri licha di Bilik Baum AZAM di Kompleks AZAM ditu, kemari.
Bejaku baru ku Ichikawa, nya ngujungka tebal agi peranak di menua pesisir Jepun diuan orang tuai.
Nitihku iya, nengah pansik kes di rumah panjai di Baram enggau Rajang nyauka urung 70 peresin pintu nadai orang nguan.
Ukai semina nya aja, aktiviti pengidup asal baka bumai bekebun, ngasu enggau ngumpul asil kampung mega enda agi chakah dikereja.
“Sebagi ari chara rumah panjai baka gotong-royong enda chakah agi dikemeran laban peranak ti nguan endur nya kurang,” ku iya.
Ba menua Jepun ku iya, pemindah raban nembiak ari menua pesisir ngagai mengeri berengkah ari tuan 1960-an, dulu agi ari Sarawak.
“Di Jepun kemaya hari tu, isu pengurang peranak menua ngujungka pengawa betanam betupi enggau kampung enda dikereja.
“Jalai pengarap, pengawa belaki bebini sereta pengawa ngibun pemarai enggau betanam betupi majak enda dikemeran laban nadai orang ti landik enggau bepenemu ngujungka beberapa komuniti punas,” ku iya.
Nya alai ku iya, tanggungpengawa perintah amat beguna dikena mutarka sereta nyeliahka penanggul nya ari ke nyadi di menua tu.
“Taja pan di Jepun nadai chara agi dikena mutarka pekara nya, tang aku ngasaika di Malaysia agi ulih diseliah nengah kerejasama semua piak lebih agi piak perintah,” ku iya.
Bisi datai ba pengerami nya, Pensyarah Fakulti Sains Sosial UNIMAS ti mega chairman pengerami Prof Dr Spencer E Sanggin.