Di Malaysia diatu kaul dua pekara (1:700) enda chukup beratika gaya penyalah digaga ke majak berubahKUCHING: Pengurang raban polis di nengeri enggau menua pesisir, kaul dua pekara (KDP) seiku polis ngagai pemayuh rayat enda agi ulih nitihka KDP INTERPOL 1:200, iya nya pansik INTERPOL ke enda resmi lalu kebuah penyampau nya deka dipansik baru.
Menteri Dalam Menua Datuk Wan Junaidi Tuanku Jaafar madah nitihka atur INTERPOL suba, KDP tiap-tiap 200 iku rayat enda tau enda bisi seiku polis (1:200) ba setiap menua.
“Ba menua kitai diatu, KDP ke dikena ngelama tu, 1:700 jauh endar enda chukup.
“Di nengeri enggau menua pesisir agi bisi bebagi laban rayat kitai ke diau di sesebengkah sitak nya sama-sama 50 peresin (dalam mengeri) sereta 50 peresin (dalam menua pesisir).
“Enti di nengeri nyangka tau kitai ngena (kaul dua pekara) INTERPOL tang di menua pesisir enda ulih. Kebuah nya, ambika chunto baka sitak Baram, pemayuh mensia ke diau dia ngachir tang enda mega enda di jaga polis nyema bisi kes orang bechurika kayu, utai ke ditanam tauka kes bukai, polis tetap napat endur nya,” ku Wan Junaidi.
Iya bejaku ba aum media pengudah abis atur pengawa nyuaka BR1M ngagai mensia mayuh di Dewan Perbadanan Produktiviti Malaysia, ditu kemari.
Berindik ari nya, iya madah diri udah ngasuh Opis Indu Polis nengah Sapit Kepala Polis Menua ngaga sistem pansik kediri empu bakani ku gaya Perintah ulih gawa ungkup mensia mayuh.
“KDP kitai agi jauh endar….KDP Interpol enda ulih dikena, nya kebuah aku ngasuh Opis Indu Polis ngaga pansik nya,” ku iya.
Bida iya ku Wan Junaidi, Perintah enggau chara atur BOS (Blue Ocean Strategy) ngulai polis, RELA, JPAM enggau gerempung bukai.
“Bah, bakani ku endur ke nadai JPAM, RELA, tauka sedadu? Enti ulih, tiap-tiap palan polis nya patut bisi (polis tambah) kediri empu ngena chara kediri empu.
“Baka enti polis empu bisi (Polis tambah), sida tau dilatih pengawa polis tang sedadu, RELA enggau JPAM enda dilatih pengawa polis lalu (polis tambah) mega bisi kuasa di baruh undang-undang nyadi polis selama.
“Kuasa sida serap, utai ke ulih digaga polis selama, ulih digaga sida iya,” ku iya.
Iya nandu baru, atur mansik pekara nya mega udah di serah ngagai pemesai polis bukai ngambika pekara nya ulih dipansik, ngena (polis tambah) ngambika dalam tiap syif sida iya, abis kurang pan bisi 10 polis.
“Pemayuh 10 iku nya siti syif pan agi enda chukup laban enti dibagi ngagai tiga syif semina tiga iku aja ke gawa dalam siti syif. Enti seiku nyaga palan, dua iku aja ke ulih kenyadika mutarka siti sitak ke besai…Agi enda chukup,” ku iya.
Nya alai, ku iya, (kaul dua pekara) nya patut ditambah, tang ngelatih tauka ngambi orang gawa nyadi polis semina dalam urung 4,000 dalam setaun baka ke asuh ulih Suruhanjaya Penambahbaikan Polis entara taun 2004-2005.
“Dalam timpuh ke sama mega, kitai betapi enggau urung 1,500 polis ke pinchin tiap taun. Kitai empu beratika berapa iku ke masuk nyadi polis, berapa iku pinchin udah nya,” ku iya.
Kelimpah ari nya, iya madah Opis Menteri Dalam Menua (KDN) udah madah ngagai Perintah ngelatih sereta ngambi mayuh agi orang nyadi polis, lalu iya ngarapka Jabatan Perkhidmatan Awam (JPA) enggau Menteri Wang deka ngemendarka pekara nya.
“Nya alai, kami ngelaluka sida ke deka minta nyadi polis kelebih agi ari pupu bansa ke ukai Bumiputera (China enggau India) minta nyadi polis.
“Kami ngelaluka nembiak ukai Islam, ukai Melayu, ukai Bumiputera masuk nyadi polis,” ku iya.
Kelimpah ari nya, iya madah entara pengawa KDN ke deka digaga dalam taun tu, iya nya ngemansangka urung lapan bengkah perengka guna polis di serata menua kelebih agi di Sarawak.
“Pekara tu udah dipejuraika enggau Unit Perambu Ekonomi (EPU), lalu dijangka deka ngaga urung lapan projek ke taun tu di Sarawak, kelimpah ari Kedah, Kelantan, enggau Perlis,” ku iya.
Ba aum media nya mega, Wan Junaidi mega madahka penusah ke nyadi ba dua iku raban polis ke kena serang di Taman Sentosa di Kelang bedau lama tu tadi, madahka ari sukut Prosedur Operasi Setindit (SOP) nya endang enda salah.
“Enti saspek nya indu, orang ke meresa mega polis indu, ukai polis lelaki, lalu kebuah polis deka mai indu nya ngagai balai polis ngambika iya diperesa polis indu,” ku iya.
Iya madah baka nya lebuh bekenangka pasal dua iku raban polis ke kena serang lebuh bejalaika pengawa sida lalu bisi nangkap orang ke disangka bisi ngereja penyalah urung pukul 5 pagi.
Pengudah meresa saspek lelaki, polis nya lalu mai saspek indu ngagai balai polis ngambika tau diperesa polis indu.
Tang bedau sempat saspek indu dibai ngagai balai polis, dua iku polis nya diserang saspek lelaki lalu seiku ari polis nya, Koperal Raja Aizam Raja Mohd parai, tang Koperal Mohd Aidil Mustafa bakal lalu benung diperubat di sebuah sepital di Kelang.
Taja pia, dua iku saspek lelaki ke dipelaba ari menua luar parai kena timbak Mohd Aidil maya ke ngerampas pistol iya ari saspek.
Kes nya diatu benung ditasat polis.