Mensia mayuh diperansang ngulu kos seraya ngayanka penyiru ba jaku asal bansa diri, ku Kayong
SIBU: Serakup Penulis Iban Sarawak (SIWA) keterubah iya merambu deka ngatur Kos Nengkebang Jaku Sempama Iban ti tebuka ngagai mensia mayuh.
Kos sehari berunggu tu ila deka diatur di Sibu Jaya tang taja pan baka nya palan enggau kemaya kos diatur empai dipadahka dulu.
Pengari komiti kos tu, Casper Kayong Umping madah, kos tu ila dibagi ngagai: Bekelala enggau Jaku Sema lalu ditangkan Nengkebang Jaku Sempama enggau Jaku Sempama ba Ulah Mensia, Jelu enggau Utai Tumbuh.
Iya madah ba bagi keterubah, Bekelala enggau Jaku Sema, penyereta kos deka dibantai sereta diajar enggau chara ngena Jaku Sema.
“Chunto Jaku Sema baka ‘Gamal Baka Kera’, ‘Mulung Di Linut’ enggau mayuh agi.
“Lalu Nengkebang Jaku Sempama bisi dibagi ngagai dua bengkah.
“Keterubah iya nya Jaku Sempama Selapis. Chunto ba jaku tu baka ‘Enda Baka Chabi Baka Lia, Berasai Pedas Tekala Nya’.
“Nyadi chunto Jaku Sempama Dua Lapis iya nya baka ‘Ingkat Nemu Nyapat Lubang Kilat, Tang Enda Nemu Mampul Lubang Guntur. Bengkang Mangkang Lubang Nyang, Tang Enda Nemu Mampul Lumbang Lambur’,” pia ku iya madah ngagai pengarang berita ditu, kemari.
Kayong madah, ba kos tu mega penyereta deka diajar enggau Jaku Sempama ba Ulah Mensia, Jelu enggau Utai Tumbuh.
“Ba kategori tu bisi 15 iti bagi tauka pechah.
“Sekeda ari nya baka Jaku Sempama Sindir. Jaku tu seraban ari chabang Jaku Sempama ti suah disebut, dikena nyeriri tauka nyindir lalu sindir nya dikena mantah, bejai, bebula enggau ngelanjurka orang.
“Jaku tu dikena nyindir gaya gamal, ulah, pendiau, perangai, kereja, penemu enggau sekeda utai bukai ti nyemetak didinga orang kelimpah ari dikena ngelaung nyebut semua pekara awakka enda ngemedis ati tauka ngemalu pangan diri.
“Chunto Jaku Sempama Sindir baka ‘Baru Kena Kenyit Ai Bah’ ti mai reti dikena nyindir orang ti baru ensepi kena kenyit penyamai tauka baru kena kenyit bisi utai,” ku iya madah.
Iya madah, sekeda ari pechah Jaku Sempama iya nya Jaku Sempama Tangkan. Suah agi jaku tu dikena orang ke tuai meri jaku tangkan, nagang lalu ngelalau pendiau, nyaga ulah, perangai tauka kereja enggaika tekelalu lunggar ti ngujungka kitai tulihka penusah, pemedis, pengasa tauka pengelebu.
“Chunto Jaku Sempama Sindir baka ‘Itit Nyemerai Sungai Mati Aus, Manuk Nepan Atas Tibang Mati Kebururan,” pia ku iya.
Ku Kayong madah, semua bengkah pekara ke dibantai ba kos nya endang ngembuan tuju deka nambahka penemu mensia mayuh lebih agi rebak baru nyemetak agi enggau Jaku Sempama Iban seraya ke ngetan jaku asal bansa Iban ari ke punas.
Nambahka nya, iya madah, enti deka belajar pengap, nimang, biau, sampi, pia mega baka Jaku Silup, karung, ensera, wa enggau mayuh ke bukai enda tau enda bepun ari Jaku Sempama ti ditengkebang ari Jaku Sema.
“Udah landik ba Jaku Sempama ti bepun ari Jaku Sema baru kitai ulih belajar bebiau tauka sampi,” ku iya nerang.
Kayong madah, palan enggau kemaya kos tu diatur bedau ditentu ke dulu lalu deka dipadah nangkan ke tu ila.
Bayar masuk kos ku iya, RM30 seiku.
“Kitai ngarapka mensia ulih datai ngambi bagi ngulu kos tu ila laban tu sebengkah ari chara kitai ngetanka jaku asal bansa kitai Iban.
“Kelimpah ari nya, penatai kita mandangka sukung ngagai pengawa kitai ngetanka jaku asal bansa diri,” ku iya nandu.
Pengawa ngerijista enggau penerang bekaul enggau kos tu tau ditanya ngagai Kayong empu nengah lumur 019-8142 510 tauka pengajar Harry Usop Umbar (011-14019 115) enggau Ina Mawas (010-5211 767).