SRI AMAN: Projek ngaga Jalai Basi – Sri Aman ungkup Pakej A Renggat 1 ba kandang menua Brayun, Sri Aman ke beungkus RM8.598 miliun, berengkah digaga kena 25 March taun 2013, diatu urung 60 peratus tembu.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, projek melakin jalai penyauh 2.1 kilometer nyengkaum ngaga sebuah jematan semin ke pemanjai 72 meter meraka Sungai Undop (Nanga San) ditu, mujur dipejalai sereta nyauka tembu digaga.
Ku iya, kompeni Hock Seng Lee udah dikearapka ngaga jalai alun nya sereta diberi timpuh 18 bulan nembuka projek nya, nyentuk 24 September taun baru.
“Tu ulih ngenyampatka pejalai peranak menua ari kandang menua Basi, Engkilili ke Sri Aman enti projek nya tembu ila,” ku iya lebuh ke ngabas projek ngaga jalai alun nya.
Harden ke mega Kaban Kunsil Nengeri (ADUN) Simanggang madah, projek ngaga jalai alun pemanjai 25 kilometer kena nyambung kandang menua Brayun-Basi-Empelam enggau Stuga ke beungkus RM80 miliun, bedau nerima ungkup belanja naka ke diatu.
“Aku enggau ADUN Engkilili, Dr Johnnical Rayong Ngipa udah nganjung peminta nya ngagai Opis Menteri Pemansang Menua Pesisir enggau Kandang Menua, lalu salin peminta nya dianjung ngagai Menteri Besai.
Iya arap perintah jampat agi ngemendarka ungkup belanja laban enti projek nya dipejalaika ila, deka meri pengelantang ngagai tiga buah sekula primari enggau 27 buah rumah panjai ba kandang menua nya.
Ku iya, projek ngagai jalai ari Brayun-Basi-Empelam ke Stuga nya tampung projek ngaga Jalai Basi-Sri Aman ungkup Pakej A Renggat 1.
Sama bisi dia maya nya, Sapit Chairman Opis Kaunsil Pelilih Mit Sri Aman (MDSA), Kaunsilor Sawing Sumar enggau Ketuai Nembiak Parti Sa’ati Rayat Sarawak (SUPP) Pamapng Simanggang, Patrick Michael.