KUCHING: Penembu Palan Penapis Ai Beresi Lubau, Layar ila disadang ulih mutarka penanggul bepun ari pemaruh peneras ai ti ditapi peranak rumah panjai di Pelilih Betong.
Berindik ari nya Kaban Kunsil Nengeri (ADUN) Engkilili, Dr. Johnichal Rayong Ngipa ngarapka peranak rumah panjai di Betong liat ati betapi enggau penanggul suntuk ai, seraya nganti Palan Penapis Ai Beresi Lubau, Layar tembu.
Penanggul pemaruh peneras ai di Pelilih Betong ti ngeruga sekeda rumah panjai ti dipegai DUN Engkilili mega ketegal penambah penyampau rayat sereta pemansang pengawa berumah, ku iya.
Rayong dikerandau pengarang berita bekaul enggau penanggul bekal ai ditapi peranak rumah panjai di Pelilih Betong di baruh pegai iya.
“Kitai nemu rayat di rumah panjai di pelilih menua nya (Betong) bisi betapi penanggul enda chukup ai laban pemaruh peneras ai, nya berindik ari pemayuh rayat betambah, bisi sekula sereta sepital, ditambah mega Palan Penapis Ai Beresi Lubau, Layar bedau tembu.
“Kitai sinu ngenang sida ti betapi enggau pemaruh peneras ai ti ngujungka suntuk ai. Penanggul tu deka teputar enti Palan Penapis Ai Beresi Lubau, Layar tembu ila,” ku iya lebuh dikerandau apin lama ke udah.
Lebuh ditanya bekaul enggau palan penapis ai nya, iya ngarapka loji nya ulih jampat tembu ngambika rayat enda betapi enggau penanggul ai.
Penembu projek ngemanahka Palan Penapis Ai Beresi Lubau, Layar enda lama agi, enda kurang 80 peratus rayat ulih ngasaika bekal ai beresi laban palan nya ila ulih meresi nyentuk ke 30 juta liter ai sehari dibandingka enggau kapasiti 12 juta sehari diatu.
Projek Palan Penapis Ai Beresi Lubau, Layar nya dipelabaka begunaka ungkus belanja urung RM30 juta ari perintah besai.