Anda di sini

Penanggul enggau pengurang penyikap kereban sekula menua pesisir patut dikelengkas: Baru Bian

SUAH AMPUH BAH: Baru (kiba) ninga penanggul parit ke dibantai apai indai nembiak ke besekula di SK Siang-Siang.

KUCHING: Penanggul pengurang perengkaguna di sekula menua pesisir patut diputar enggau lengkas ngambika pengelantang nembiak sekula dijaga, ngicha ulih ngadaka modal mensia ke menyana.

Kaban Kunsil Nengeri (ADUN) Ba Kelalan Baru Bian sinu meda agi bisi sekula ke ditating penanggul enggau nya ngansak perintah ngambi atur jampat lalu meri geran ke setipak ngagai sekula ke begunaka bantu.

“Opis Menteri Pelajar bisi ungkup tuju tu tang enti perintah besai enda meri timbal nya alai perintah nengeri patut napi pekara tu.

“Ari semua ke dibacha nengah surat kabar, Kepala Menteri baru (Tan Sri Datuk Amar Adenan Satem) kenu seiku mensia ke sedia mending enggau mantu…aku arapka iya betatika pekara tu lalu mutarka penanggul nya,” ku iya ba aum media, ditu kemari.

Baru ke mega Ketuai Parti Keadilan Rakyat (PKR) Nengeri madah,  penanggul nya enda patut nyadi lebih agi maya sekula nya baru digaga.

Bechuntoka SK Long Luping urung 79 kilometer ari Lawas ,ku iya sekula baru enggau kuarters pengajar baru digaga beberapa taun ke udah tang pekara ke ngasuh kitai alit ati, iya nadai bekal ai.

“Aku kesal laban sekula nya ngembuan rumah ke manah dipeda tang nadai dibekal ai … kati sebuah sekula tau digaga enda mungkur bekal ai beresi nyadika sebagi ari pelin?

“Aku arapka opis menteri ke bekaul, tauka perintah nengeri ngambi atur ke setipak,” ku iya.

Nitihka padah PIBG sekula sida bisi nerima ungkup  RM70,000 dikena nudukka sistem ai graviti ngambika bisi dikena sekula nya.

Taja pia ku iya projek nya diketu setegal suntuk belanja.

Naka ke diatu sekula nya bepanggai ba sungai ke enda jauh ari nya.

Penanggul ai mega ditapi Sekolah Menengah Kebangsaan (SMK) Tinjar di Baram, ku iya.

Iya mega minta penanggul parit di SK Siang-Siang diputar dikena nyeliahka penusah bah.

“Aku meda padang bol sekula nya manah, tang sayau enda tau dipenggau laban penuh batu-batu ke tajam,” ku iya.

Kelimpah ari nya, iya nanya, ni maya SK Sukang ke udah dileka nya deka tembu gaga.

“Aku deka nasat kebuah projek nya dileka baka nya aja. Nama penyadi  kunteriktor ke udah diberi tanggungpengawa … bisi nya nyebut penanggul nya bepun ari duit ke enda chukup lalu enti amat Opis Pelajar patut mantu ngagihka duit ngambika ulih jampat tembu.

“Penanggul sekula tu ditemu dalam penemuai aku ke Lawas beberapa hari ke udah… aku enda ulih mikir ni penyampau sekula bukai di Sarawak ke bisi penanggul ke sebaka,” ku iya sambil ngarapka perintah ulih jampat beratika pekara nya.