Anda di sini

Pemulai G5 ngagai SPDP ngenegapka parti sereta BN

Advertisement

KUCHING: Pemulai lima seraban (G5) begempung baru enggau Parti Demokratik Progresif Sarawak (SPDP) jalai ti pemadu manah ungkup semua, lebih agi ngagai Barisan Nasional (BN), ku penanalisis politik Dr Ahi Sarok.

“Gempung begulai baru kededua piak manah ke  pengundi lalu sida iya mega mayuh agi awak  beratika sitak diri, lalu enggau nya ngurangka pengawa bepolitik.

“Pemulai kededua piak ngagai pangan diri deka ngurangka penyarut politik, lalu ngambika semua sida tu (ari sida charut) ulih betatika sitak diri enggau nyentuk agi,” ku Ahi lebuh dikerandau ‘The Borneo Post’ kemari.

Iya mega madah munyi nya, lebuh diasuh nimbal perambu Kepala Menteri, Tan Sri Datuk Amar Adenan Satem ke ngasuh sida begulai baru memanah enggau pangai diri. Ahi, ti mega presiden Serakup Graduet Bidayuh Sarawak (SBGA) madah enti perambu nya amat nyadi, deka meri penguntung ngagai SPDP kelebih agi parti nya deka nerima pulai baru lima iku kaban ti mega nyadi ADUN dibanding enggau semina presiden parti nya kediri aja, Tan Sri William Mawan Ikom.

Ba pengawa bepilih besai menua 2011, parti nya menang 6 ari 8 kerusi tang enda lama udah nya, lima iku kaban parti nya dibuai tauka ningkilka diri.

Empat iku ADUN nya, Datuk Peter Nansian Ngusie (Tasik Biru), Datuk Sylvester Entri Muran (Marudi), Rosey Yunus (Bekenu) enggau Paulus Palu Gumbang (Batu Danau) enggau G5 lalu Wong Judat (Meluan) pansut ari parti laban masuk Sarawak Workers Party (SWP).

Penanggul ke ditapi SPDP belabuh ari penyarut ba pemesai parti nya tang berindik ari jaku lalau ari Adenan empu, sida iya besedia mulaika diri lalu badu charut enggau pangan diri, berengkah diau enggau pendiau ke baru.

Taja pia, ni naka pengelengkas utai tu nyadi, semina timpuh nya aja ke dianti.

Advertisement