SIBU: Peranak Rumah Jemiah Keling, Sungai Naman ditu majak nerima bantu ari mensia mayuh bepun ari penusah angus ti nuntung sida kena 28 Februari tu tadi.
Kelimpah ari nya sida serumah mega bisi nerima bantu ari ejensi perintah, peranak rumah panjai nya mega nerima bantu ari kompeni luar, pengari rayat enggau orang ti ngatika diri.
Jemiah maya dikerandau, madah, sida serumah meri besai terima kasih ngagai semua ke udah gerah jari nyuaka bantu ngagai sida.
“Kami ditu endang bepanggai bendar nerima bantu ari mensia mayuh ke sinu ngagai penusah ke bisi nuntung kami serumah lebih agi sida ke tuai enggau nembiak mit,” ku iya, kemari.
Dulu ari nya iya ngarika sida serumah nerima bantu ari seiku kaban Opis Kaunsil Pelilih Mit Menua Pesisir Sibu (SRDC) Kaunsilor Jimbau Galau.
Maya tu mega Jimbau ngarapka mensia mayuh ke bukai anang sanggu nyaup ngelempungka penusah ti nuntung sida Jemiah serumah.
Nambahka nya ku iya, peranak rumah panjai nya diatu benung bekenaka ramu ngentak rumah arau dulu sebedau ngentak baru.
Penusah angus ke nuntung rumah panjai tu nyadi kena 28 Februari tu tadi ngujungka urung 200 iku sida serumah lenyau palan pendiau.
Taja pan baka nya nadai penusah bebadi nyadi taja raban bomba napi penanggul maya ngerara api laban nadai bekal ai ba rumah panjai nya.