Anda di sini

Manjeet ngembuan pengerindu, penyiru mantu orang

 

BESUMPAH MANGKU PENGAWA: Maya ngangkat sumpah nyadi kunsil MBKS.

Kenyau ari kelia, bepelasarka pengidup diri, iya bisi penyinu mantu orang ke tusah

KUCHING: Bepun ari pengerindu, kenyau ari kelia, seiku kaunsilor tu ngembuan penyiru mantu orang bukai ke tusah ba pengidup.

Kaunsilor (Kr) Manjeet Sidhu, 45, madahka pengerindu diri mantu orang ke tusah laban gaya pengidup iya ngelama tu mayuh udah ngajar diri ari pendiau ke tusah nyadi orang senang ngujungka iya rindu mantu orang bukai.

“Aku rindu ngabas orang tuai ti diau di Rumah Pengandai Tuai laban sinu ke sida. Sida tu dianjung anak tauka kaban belayan diau dia nyangka bisi kebuah ke berat. Utai baka tu enda patut nyadi dalam komuniti kitai laban kitai tu raban bansa ke siru,” ku Manjeet seraya nambah, pejalai iya ukai semina ngabas orang tuai aja, tang mega ngabas orang ke sakit riman tauka bala nembiak.

Manjeet ti mega chairperson Parti Demokratik Progresif Sarawak (SPDP) Sayap Indu Satok madah, lebuh mantu orang baka tu, nya ukai pekara ke muntang digaga laban tiap kali deka mantu, utai ke nyadi penanggul tetap belanja.

“Kekadang ngena duit diri empu tang mujur bisi parti, raban korporat tauka orang ke siru bisi nyuaka bantu. Bisi maya kami, Sayap Indu begumpulka duit entara kami empu.

“Ba tulung ngagai sida ke kena sakit riman, ke datai ari menua pesisir lalu nadai kaban belayan semak, kami Sayap Indu deka mantu mutarka sida iya, lalu bisi maya mega kami mantu meri belanja. Kekadang bisi mega kami tetemuka sida ke datai ari menua pesisir suntuk belanja, lalu bisi maya nadai belanja kena mulaika diri ke menua,” ku iya.

Manjeet ke bedau lama tu tadi dipadu mangku pengawa nyadi kaunsilor MBKS kena 27 Januari tu tadi madah, taja pan mayuh macham bantu ke diberi orang kemaya hari tu, komuniti kitai, ku iya tetap ngumbai belanja nya pekara ke balat dikemerat.

“Kadang-kadang kitai ngasaika nyau ukai penyiru agi ke ulih diberi kitai. Komuniti kitai diatu ngumbai duit nya pekara lumur satu. Dalam komuniti kemaya hari tu, pemerat agi bepanggai ba penyiru ari ati kitai empu. Nya alai, enti kitai deka bejalaika sesebebgkah pengawa, gaga ari ati ke lurus, ukai semina bejaku aja, tang ditangkan enggau pengawa, nya ke berat,” ku iya.

Lebuh ditanya, bakani iya bejalai mantu orang bukai enti komuniti ngumbai duit nya pekara lumur satu, ku Manjeet:

“Ukai semina nyuaka belanja aja, tang pemanah orang ke deka mantu tau mega meri utai bukai baka pemerat ke diguna sida iya.

“Barang gaya bantu ke diberi orang, mit tauka besai, barang penyampau. Kelimpah ari nya, kami Sayap Indu mega ngumpul belanja ari raban korporat, diri sebilik enggau bala pangan.

“Ambika chunto, lebuh bejalai ngabas orang tuai, kami meli pampers enggau rengka bukai ti dikemerat  orang tuai. Dalam komuniti kitai, bisi mega orang ke seruran nyukung pengawa pengasih baka tu, lalu sida iya enggau naka ulih mantu,” ku iya lalu nambah, nadai pengawa enda ulih digaga enti kitai empu endang bebendar.

Kelimpah ari ukai semina nyadi kaunsil keterubah ari komuniti Sikh, lalu nyadi seiku exco dalam SPDP, meri iya mayuh peluang mantu komuniti ba sitak iya.

Manjeet mega seiku indai tunggal ke bisi empat iku anak enggau pengawa dagang ke digaga iya, madah, taja pan jari iya semua penuh megai tanggung pengawa nya, iya beterima kasih ke peneleba ke diulih iya.

“Terima kasih ngagai Presiden SPDP ke mega Menteri Pemansang Rama Tan Sri William Mawan Ikom ke meda pengelandik enggau peneleba aku lalu seruran nyukung aku belama,” ku iya.

Kelimpah ari nya, peneleba ke pengabis mar ba iya ku iya, lebuh seiku ari anak gembar iya parai bulan Julai 2013 ba bebadi jalai alun di Selangau.

“Nengah penusah baka tu ngasuh aku ka agi mantu komuniti, taja pan iya sebengkah peneleba ke ngasuh aku runggu tang aku belajar nyadi orang ke tegap agi.

“Enti aku berundingka orang bukai ke kurang ari aku, sangka aku pedis agi ba sida iya. Nya alai, aku ngasaika pemedis nya ari peneleba aku empu,” ku iya.

Lebuh ngenang pengawa salah ke seruran nyadi ba palan belepa Kuching Waterfront, iya madah diatu Sayap Indu SPDP benung mansik pekara nya.

“Meda bakani gaya pansik nya ila lalu ari nya muntang meri perambu ngagai Perintah nengah DBKU (laban Kuching Waterfront baruh jaga DBKU) chara mutarka penanggul kes runtun dia.

“Tambah mega dia palan orang belepa sereta palan dagang temuai, enda patut utai bansa nya nyadi dia,” ku iya ke diberi tanggungpengawa beratika pengawa dagang temuai enggau rampa menua baruh pegai MBKS.

Kelimpah ari nya, iya ngelalau bala nembiak ke bisi pengerindu ngereja pengawa ngatika diri  sereta deka mantu komuniti, tau nanya ngagai iya chara ngaul komuniti nengah e-mel iya empu ba jeetsidhu03@yahoo.co.uk tauka nengah Facebook ‘Manjeet Sidhu’ tauka Whatsapp ba lumur 0146926123.