Anda di sini

Chin arap bendar SUPP ulih diidupka baru

IDUPKA BARU: Adenan (duduk) begambar bebala mayuh begulai enggau kaban SUPP ti diketuaika Chin (tiga kiba) sereta ke bukai. — Gambar Kong Jun Liung

KUCHING: Kepala Menteri Tan Sri Datuk Amar Adenan Satem minta Parti Sa’ati Rayat Sarawak (SUPP) ngidupka parti nya empu, kelimpah ari ti dibantu iya (Adenan).

Pekara nya dipadahka Presiden parti iya, Tan Sri Peter Chin lebuh ditanya pengarang berita pengudah meri penemuai basa sereta baum enggau Kepala Menteri Tan Sri Datuk Amar Adenan Satem ba Wisma Bapa Malaysia ditu, ngalih hari kemari.

Iya madahka diri lantang ati ninga penemu Kepala Menteri ti deka mantu mutar sereta dekaka parti SUPP idup baru.

“Sebengkah pekara positif ari Kepala Menteri ba SUPP, lalu aku deka nandu sebut iya “Kitai mesti ngidupka SUPP”.

“Aku ti nyadi Presiden SUPP berasai gaga ati ninga penemu Kepala Menteri ti madah deka nyaup ngidupka parti tu,” ku iya.

Nambahka nya dalam aum nya ku iya, parti nerangka nama pekara tauka penanggul ti nyadi dalam parti ari taun 2011 suba.

Maya baum, Adenan diterangka pasal isu tauka penanggul ti nyadi dalam parti sereta pekara bekaul enggau Opis Pengerijista Bansa (ROS) lebih agi pekara ti nyadi pengudah Aum Tiga Taun Sekali (TGM) 2011, kelimpah ari pasal pampang Piasau enggau Bekenu, ku iya.

“Semua nya dipadahka ngagai Kepala Menteri ngambika iya ulih nemu enggau silik kebuah pekara ti kebendar nyadi dalam parti.

“Kami gaga laban randaunya ngayanka penyiru lalu semua Komiti Pengereja Pengawa (CWC) diberi awak mansutka penemu,” ku iya seraya madahka nya simpul jurai enggau Kepala Menteri.

Kelimpah ari nya Chin madah, SUPP bedau nerima timbal ari ROS taja pan surat udah dibalas kena 4 Februari sereta Surat Tunjuk Kebuah udah dianjung kena 6 Januari tu tadi.

Sama datai nemuai basa sereta baum enggau Kepala Menteri kemari, Sapit Presiden SUPP Datuk Richard Riot, Sekretari Besai SUPP Prof. Dr. Sim Kui Hian enggau ke bukai.

Nyempulang Adenan kemari, Naib Presiden Parti Pesaka Bumiputera Bersatu (PBB) Datuk Amar Abang Johari Tun Openg sereta Naib Presiden Kanan PBB Datuk Amar Awang Tengah Ali Hasan.