Anda di sini

Baucher BR1M sitak Padungan, Pending berengkah disadung sehari tu

Advertisement

KUCHING: Semua penerima Bantu Rayat 1Malaysia (BR1M) 3.0 sitak Kunsil Nengeri (DUN) Padungan enggau Pending ti enda nerima ngena akaun bank, ulih ngambi baucher nya ba Indu Opis Parti Sa’ati Rayat Sarawak (SUPP) berengkah sehari tu.

Pekara nya dipadahka Ketuai Raban Nembiak SUPP, Tan Kai (gambar kiba) lebuh dikerandau pengarang berita maya ti sama datai meri penemuai basa ngagai Kepala Menteri Tan Sri Datuk Amar Adenan Satem ditu, kemari.

Iya madah, sida ari Opis Residen deka nyerahka baucher nya ngagai indu Opis SUPP ngambika ulih disadung ngagai penerima BR1M 3.0 ke enda ngena akaun bank.

“Pagila (sehari tu) Opis Residen deka nyerahka lis enggau baucher BR1M ngagai indu opis SUPP, udah nya kami deka lalu nyadung ngagai penerima, tu ke pengelantang orang mayuh.

“Baucher nya semina ke penerima BR1M 3.0 ti enda nerima nengah akaun bank.

“Penerima ulih berengkah ngambi baucher ba Indu Opis SUPP ti dibuka berengkah pukul 9 pagi ngagai pukul 4 lemai,” ku iya.

Kelimpah ari nya iya madah, penerima ba sitak DUN Batu Lintang, Kota Sentosa enggau Batu Kawa deka diberi maya pengawa bejadika pengerami nya ti diatur ba Stadium Tertutup Kaunsil Bandaraya Kuching Selatan (MBK) kena 6 March tu.

Berengkah 7 ngagai 14 March, orang mayuh ulih ngambi baucher sida ari Opis Residen Kuching, lalu laluh deka diberi ngagai SUPP ngambika disadung berenggat berengkah 15 March, ku iya.

Ba BR1M 3.0, ruang bilik ti teulihka penatai pemisi dibaruh RM3,000 sebulan deka nerima bantu nya RM650, orang bujang ti beumur 21 ke atas ke teulihka penatai pemisi RM2,000 sebulan nerima RM300.

Lalu ruang bilik ti teulihka penatai pemisi RM3,000 ngagai RM4,000 sebulan mega nerima RM450.

Advertisement