MARUDI: Sekula primari ba Zon Baram Tengah mujur nyadi champian ba pekit antara zon karnival tiga hari MSSR ke baru tembu malam kemari ke alai program penudi nya Pekit Belagu Karaoke ke diatur ba Dewan Suarah Baram ditu.
Tempat kedua dimenang Zon Tinjar lalu ketiga pulai ngagai Zon Tutoh Apoh lalu zon ke bukai ke bisi masuk karnival tiga hari nya Zon Baram Hilir eggau Zon Baram Hulu.
Pengerami penutup enggau pengawa nyuaka perais dipenyadika Kepala Opis Pelajar Baram, Yunus Apok ke ngarika Sapit Menteri Bekal Ai enggau Betanam Betupi (Gerempung Orang Bumai) Datuk Sylvester Entri Muran, ditu.
Dalam jaku pandak iya, Yunus Apok ngenataika besai terima kasih ngagai semua orang ke bisi ngambi bagi dalam karnival tiga hari nya.
Iya mega beterimakasih ngagai lebih 100 iku pengajar ari Sekula Primari Pelilih Baram ke udah bekerejasama begulai ngereja pengawa ngujungka karnival nya mujur diatur.
Seraya nya, dalam Pekit Belagu Karaoke champian dalam bagi lelaki dimenang Brian Ingan Lavung ari Zon Tutoh Apoh ke belajar ba SK. Long Atip bulih 416 mark, kedua enggau ketiga pulai ngagai Anderson Tadem ari Zon Baram Tengah (SK.Long Pilah) enggau Paulus Gallang ari Zon Baram Hilir (SJK Sg Jaong) seraya dalam bagi indu, champian dimenang Marciana Usat ari Zon Baram Hilir (SK.Dato Sharif Hamid) enggau tempat kedua Kimberly George ari Zon Baram Hulu (SK.Long Makabar) lalu ba tempat ketiga nya pulai ngagai Nigellia Arenny ari Zon Baram Tengah (SK.Ubong Imang).
Dalam Pekit Boria, Champian dimenang Zon Tutoh Apoh enggau kedua Zon Baram Tengah lalu ketiga nya Zon Baram Hulu.
Gelar atlet lelaki ke pengabis nyulut nya pulai ngagai Lucas Wan Zon Baram Tengah lalu ungkup indu nya dimenang Dolly Uring Zon Baram Tengah.
Bela bisi ngulu pengerami penutup nya Sapit Kepala Opis Pelajar Baram, Jalong Ugat Wan, Chairman MGB, Samuel Iwat enggau kelelima Chairman Zon Baram.