KENUKUKA SEPIL JAKU IBAN: Siang (kanan) begulai enggau (ari kiba) Philip Brodie, Desmond Surai, Padang Luna, Simon Suti, enggau Dr Chemaline Osup maya simposium Iban ditu, empai lama ke udah.
Semua asil tulis ti dikeluar dalam jaku Iban patut ngena sistem sepil ke udah menuku
MIRI: Raban bansa Iban lebih sida ke rindu macha asil tulis dalam jaku Iban tau saru, laban sepil leka jaku ke enda sebaka ba utai tulis ti dikeluar.
Seraban tuai rumah (TR) ari Kapit ti ngemeratka pekara tu, minta penyaru nya diputarka enggau lengkas ngambika setipak enggau pengawa ngelaku sereta ngangkatka pemanah guna sereta reti jaku manggai ba tikas ke tinggi.
Ketuai Pengarang ti ngeluarka nya nyengkaum orang ti ngemeranka pengawa ba media, enda patut ngemendarka pekara tu nyadi.
Sida patut ngena sepil ti udah ditetapka orang ke bisi kuasa ba jaku, ku sida.
“Suah kami macha berita Iban ba surat kabar menua tu, ke alai sekeda leka jaku disepil salah sereta enda sebaka.
“Ambika chunto baka leka jaku `sidak’, `akik’ enggau `inik’, patut disepil `sida’, `aki’ enggau `ini’, nadai mai urup `k’,” ku sida. Ku sida nandu, kekadang sida bisi nemu leka jaku `sida’ ke dikena ba surat kabar disepil `sidak’.
“Pekara tu amat nyaruka kami”, ku sida.
Bala ketuai rumah panjai nya ngenang pekara tu maya Simposium Iban ke diatur ba Palan Pematih Pengajar di Bakam ditu, apin lama ke udah.
Sida nya sebagi ari 300 iku bansa Iban ari serata menua tu ti ngulu simposium nya nyengkaum bala tuai rumah, ketuai raban bansa Iban, ketuai komuniti bansa Iban, orang ke pepandai, pengari, pengajar enggau pelatih jaku Iban.
Semua orang ke ngulu simposim nya sepenemu enggau penemu ti dibantaika raban ari Kapit nya, sentang sepil ti enda sebaka ke dikena ba surat kabar lalu meransang bala ketuai pengarang enggau orang ti ngemeranka pengawa ba media ngemetulka nya.
Ku sida baru, sepil `sida’, `aki’ enggau `ini’ nya endang ke asal, sida enda patut ngubah nya sepeneka ati .
Simposium nya keterubah endar udah diatur di Miri.
Simposium nya diatur bala ketuai raban bansa Iban begempung enggau Palan Pematih Pengajar, Kampus Sarawak, Miri sereta Bagi Iban ari Radio Televisyen Malaysia (RTM), Miri ti betuaika chairman ke mega ketuai komuniti Iban, Pemancha Wilson Siang Lim.