Anda di sini

Rintai kabinet nengeri ti diketuaika Adenan nadai berubah

Advertisement

SEMUA MENTERI MUDA: (Ari kiba ke kanan) Liwan Lagang, Rosey Yunus, Robert Lawson Chuat enggau Datu Len Talif Salleh macha semaya sida nyadi menteri muda.

KUCHING: Kabinet nengeri ti betuaika Kepala Menteri, Tan Sri Datuk Amar Adenan Satem madah ba rintai kabinet ke diatu ari baruh iya, nadai berubah, meruan ‘status-quo’ tang semina pangku pengawa Adenan ke lama ‘Special Function Minister’ enggau Menteri di Opis Kepala Menteri nadai diganti.

Semua pangku pengawa nya berengkah ari 1 March tu tadi.

Adenan lebuh bejaku ba aum media, pengudah atur besumpah mangku pengawa ungkup menteri kabinet nengeri di Kompleks Kunsil Nengeri (DUN) kemari madah, pangku pengawa iya kelimpah ari Kepala Menteri, iya mangku pengawa nyadi Menteri Wang enggau Menteri Pengintu Penatai Pemisi enggau Rampa Menua.

“Semua pangku pengawa tauka rintai kabinet agi mengkang sebaka tauka ‘status quo’ lalu semina pangku pengawa aku ke suba nadai diganti,” ku iya.

Kebuah nadai sebarang ubah dalam rintai kabinet nya ku iya laban rintai kediatu udah chukup manah.

“Rintai kabinet kitai chukup manah sereta betul tuju, nadai kebuah nukar kabinet,” ku iya.

Ba pangku pengawa Sapit Kepala Menteri enti Perintah Nengeri deka nambah baru, ku Adenan: “Pekara nya agi diperundingka. Aku deka madah ba maya sereta endur ke betul,” ku iya.

Ba sebengkah tanya ngagai Adenan enti Perintah Nengeri deka maduka tiga iku Sapit Kepala Menteri, iya nandu saut iya baru: “Aku deka madah ba maya enggau endur ke betul. Nadai utai diperumban,” ku iya.

Ba pangku pengawa iya ke suba nyadi Menteri Tugas-tugas Khas enggau Menteri di Opis Kepala Menteri, iya madah ke diatu, pangku pengawa nya awakka iya dulu ba opis menteri, lalu enti patut diisi, iya deka diisi, enti iya bisi kebuah ti berat, ku iya.

Ba atur pengawa bepilih mit di Balingian, udah kerusi nya kusung berindik ari penyandang kerusi nya, Pehin Sri Abdul Taib Mahmud udah mangku pengawa nyadi Tuai Pemegai Menua (TYT), Adenan madah sida iya agi nganti Opis Pengawa Bepilih madahka ni maya nganjung nama sereta hari bepilih di sitak nya.

“Barisan Nsional (BN) ulih menang ba sitak nya, laban ngelama tu pan, BN menang dia laban rayat agi ngarapka BN,” ku iya lalu nambah bisi sekeda nama udah dianjung ngagai iya ke dijangka entara nama nya, seiku deka nyadi chalun Balingian.

Ba berita ke madahka dijangka maya bepilih mit Balingian tu ila, chalun ngatika diri dijangka bisi tujuh iku deka betangkup enggau chalun BN, ku Adenan: ‘Chalun ngatika diri peneka ati sida iya deka bediri tang kitai enda ulih nyamin sida iya enda lenyau deposit,” ku iya.

Rintai Kabinet nengeri baka ke ditusun Adenan berengkah 1 March tu tadi: Kepala Menteri: Tan Sri Datuk Amar Adenan Satem, Menteri Wang: Tan Sri Datuk Amar Adenan Satem, Menteri Pengatur Penatai Pemisi enggau Rampa Menua: Tan Sri Datuk Amar Adenan Satem, Sapit Kepala Menteri: Datuk Patinggi Tan Sri Alfred Jabu anak Numpang, Menteri Pengawa Betanam Betupi Moden: Datuk Patingi Tan Sri Alfred Jabu anak Numpang, Menteri Pemansang Menua Pesisir: Datuk Patinggi Tan Sri Alfred Jabu anak Numpang, Menteri Wang Kedua: Dato Sri Wong Soon Koh, Menteri Opis Kandang Menua enggau Pemansang Komuniti: Dato Sri Wong Soon Koh, Menteri Perambu Pemansang Penatai Pemisi enggau Rampa Menua Kedua: Datuk Amar Awang Tengah Ali Hassan, Menteri Perengka Guna Mensia Mayuh: Datuk Amar Awang Tengah Ali Hassan, Menteri Pemansang Pengawa Industri: Datuk Amar Awang Tengah Ali Hassan, Menteri Pemasang Tanah: Tan Sri Datuk Amar James Masing, Menteri Pemansang Pengawa Rama: Tn Sri William Mawan Ikom, Menteri Pengawa Berumah: Datuk Amar Abang Johari Tun Openg, Menteri Pengawa Dagang Temuai: Datuk Amar Abang Johari Tun Openg, Menteri Pemansang Infrastruktur enggau Penyambung: Dato Sri Michael Manyin anak Jawong, enggau Menteri Pengintu Pengelantang Pendiau, Pekara Orang Indu enggau Pemansang Ruang Bilik: Datuk Fatimah Abdullah.

Semua pangku pengawa menteri muda nadai sebarang ubah.

Advertisement