SIBU: Gerempung Veteran Soldadu Malaysia Nengeri Sarawak (PVTMS) deka ngatur Pengerami Begulai enggau Ketuai Direktor Opis Pengintu Pengelantang Soldadu Veteran (JHEV) enggau Ex-Soldadu Sitak Kuching enggau Pengerami Nyuaka Pingat Jasa Malaysia (PJM) ba Balai Mensia Mayuh Pelilih Lundu kena 9 March tu.
Presiden PVTMS Thomas Ling Kui Eng madah, pengerami nya ila deka dipenyadika Patron PVTMS ti mega Menteri Muda Dagang Temuai Sarawak Brigadier Jeneral (Kehormat) Datuk Talib Zulpilip lalu nyuaka PJM ngagai 30 iku penerima.
Sida ke nerima PJM tu iya nya Ah Kuan Keu, Ali Seman Ibrahim, Awai Nyampong, Awang Zaidil Awang Eddie, Azhar Din, Chamel Dewod, David Vincent, Dohen Diuk, Duwet Lihap, Grine Tohi, Henry Iran, Homping Musa, Ismail Brahim @ Mohd Brahim, Ismail Paie, Ismail Semawi, Jerry Gaweng, Johnny Parot, Lai Boo Sin, Lising Sipat, Maringai Leadang, Martin Ronnie Dabang, Matsalleh Yusof, Mohamad Ali Borhan Muda, Nuri Baie, Obeng Gapor, Othman Abdullah @ Siaw Thin Kueh, Peehard Mangun, Reduan Busri, Simong Busu enggau Sogih Minet.
“Kelimpah ari nya 11 iku raban gerempung mega bisi nerima pemeri cheremin mata.
“Sida tu iya nya Britin Sanga, Jefry Gani, Delimin Julin, Taib Hamdan, Kennedy Galay, Chalik Tinggi, Eppie Kayat, Mendan Lugu, Resa Rantai, Empati Untol enggau Asah@Lasah Tibong,” ku iya maya aum media ditu, kemari.
Nambahka nya, ku Ling, komiti sida mega bisi ngangauka temuai ke dipebasa ke bukai baka Kaban Kunsil Nengeri (ADUN) Opar Ranum Mina, Pemesai Opis Pelilih Mit Lundu Azmi Bujang, Direktor JHEV ATM Pampang Nengeri Sarawak Leftenan Kolonel Monday Juhid, Direktor Kampus Perbadanan Hal Ehwal Bekas Perajurit (PERHEBAT) Wilayah Sabah/Sarawak Mejar (B) Ibrahim Omar sereta beberapa iku tuai raban bansa pelilih Lundu ke bukai.
“Kitai melabaka bisi 350 iku veteran ATM ari pelilih Kuching datai ngelawa pengerami tu ila.
“PVTMS mega ngelaluka penatai semua veteran ATM ari pelilih Kuching ke deka betemu enggau Ketuai Direktor JHEV ATM Mejar Jeneral Datyk Mohd Noor maya pengerami ke berengkah pukul 12 tengahari tu ila,” ku iya nandu.
Kelimpah ari nya, Ling madah, maya nya ila mega sida deka berandauka mayuh bengkah isu ti bekaul enggau veteran ATM.
Penerang silik bekaul enggau pengerami tu tau mega ditanya ari indu opis PVTMS di Sibu nengah lumur 084-348872/084-349755 tauka opis PVTMS di Siburan (082-862598).