CHUKUP BEKAL DIRI: Tanyuh (Kanan) bejaku ngagai pemberita pengudah pengawa ngepunka program nya ditu, seraya dipendingka Wilson.
SIBURAN: Gerempung Betanam Betupi Sitak (PPK) Siburan nyadang ulih nyungkakka asil padi 200 iku penyereta nengah kerejasama Opis Betanam Betupi Sarawak (JPS) sereta Gerempung Betanam Betupi Menua (NAFAS).
Chairman PPK Siburan Datuk William Tanyuh Nub madah, mayuh agi program latih senentang chara ngena rachun enggau perengka injin bumai deka diberi ngagai raban penyereta ba awak ke semak tu.
Ku iya, ari baruh pelilih mit Siburan, urung 800 hektar tanah udah dipumai ti dikereja enda kurang ari 200 iku kaban PPK Siburan.
“Naka ke diatu, asil padi di Siburan manggai ba tikas 2.5 metrik tan sehektar ke alai kitai pechaya penyampau nya ulih nambah nengah program latih enggau bantu rachun ari perintah.
“Kitai ngemeratka pengawa bumai ngambika rayat enda bangat bepanggai ba import beras ari menua luar kelimpah ari ti tau nyungkak penatai pemisi raban penyereta,” ku iya ba sebengkah aum pengarang berita pengudah pengawa ngepunka ‘Program Pemindahan Teknologi Skim Inisiatif Pengeluaran Padi Kerajaan Persekutuan’ ditu, kemari.
Program nya dipenyadika Kunsil Pelilih Mit Siburan, Wilson Spilak Asui ti ngarika Sapit Speaker DUN ke mega ADUN Tarat Datuk Roland Sagah.
Wilson dulu agi ari nya ba jaku ngemunka program madah, sekeda umai di kampung Chupak enggau Sekuduk, Padawan udah dijadika projek perintis endur ngemujurka juluk nanam padi 3 kali setaun.
Ku iya, nengah latih ari JPS, MARDI, NAFAS enggau ejensi bukai ke bekaul enggau projek perintis ba kededua Kampung Chupak enggau Sekuduk disadang ulih dikemujur.
“Diatu kitai udah mujur ngereja umai dua kali setaun lalu nya setipak enggau penetap juluk pengawa betanam betupi menua,” ku iya.
Ngenang kaul ke sama, Sapit Menijar Besai NAFAS Nordin Ibrahim ke bela datai ngulu program nya netapka, nengah ‘Dasar Agro Pemakanan Negara’, tiap hektar umai ditetap ulih ngeluarka 5 tan metrik padi.
“Manggai ba taun 2020, kitai melaba enda meli beras ari menua luar agi ke alai kitai pechaya asil 5 metrik tan ari tiap hektar chukup ungkup peranak menua.
“Diatu kitai mengkang meli beras ari menua Thailand, Burma, China enggau Vietnam ti manggai ba penyampau 400 ngagai 500 tan ninting taun,” ku iya.
Program sehari nya kemari digulu enda kurang ari 200 iku penyereta lalu ngundang pemesai ari JPS, MARDI enggau NAFAS meri licha.