INDU DIATU MAYUH PENGELANDIK: Empiang nyaut tanya pemberita pengudah nemuai meri basa ngagai Kepala Menteri di Wisma Bapa Malaysia, ditu kemari.
KUCHING: Ketuai Indu Parti Pesaka Bumiputera Bersatu (PBB) Datuk Sri Empiang Jabu nyadang mayuh agi ketuai ari raban orang indu deka dipilih bediri ngerebut penuduk kaban kunsil nengeri (ADUN) enggau kaban parlimen (MP) sereta megai pengawa nyadi sekretari politik jemah ila.
Ku iya, orang indu ke nyadi ketuai tauka dalam kaunsil tinggi tiap serakup parti Barisan Nasional (BN) diatu ngembuan chukup peneleba, pengelandik sereta penau ke tau diasur.
“Mayuh orang indu diatu ngembuan setipikit ke tinggi. Sida mangku pengawa besai ba opis perintah enggau kompeni.
“Kitai ngelempaika ngagai ketuai parti meri pemutus senentang peneka Raban Orang Indu PBB ti deka mayuh agi kitai indu nyadi ADUN, MP tauka sekretari politik.
“Berindik ari nya, mayuh agi orang indu deka nyadi ketuai dalam parti jemah ila,’ ku iya.
Empiang mansutka jaku tu ngagai pemberita pengudah ngulu raban orang indu parti begulai enggau kaban kaunsil tinggi PBB nemuai meri basa ngagai kepala Menteri Tan Sri Adenan Satem di ringkat 22, Wisma Bapa Malaysia ditu, kemari.
Iya nambah, maya ke diatu PBB bisi 3 iku ketuai orang indu nyadi ADUN enggau 4 nyadi MP.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah entara seiku ketuai orang indu ke nyadi ADUN, iya mangku pengawa nyadi ADUN Dalat.
Dua iku agi iya nya Sharifah Hasidah (Samariang) enggau Simoi Peri (Lingga).
Empat iku kaban indu ke nyadi MP iya nya Datuk Seri Rohani Karim (Batang Lupar) ke mega Menteri Pemansang Orang Indu, Ruang Bilik enggau Komuniti, Nancy Shukri (Batang Sadong) ke mega Menteri ba Opis Menteri Besai (Pekara Undang-Undang), Rubiah Wang (Kota Samarahan) enggau Norah Abdul Rahman (Tanjong Manis).