G5 SEDIA MULAIKA DIRI: Nansian lebuh nyaut pemberita seraya madah, diatu benung berundingka mekanism dikena mulaika diri ngagai parti.
Taja G5 ngena nama Kelab BN Sarawak maya ngenataika pengaga ati ngagai TYT, nya enda ngirauka Mawan
KUCHING: Kededua piak Parti Demokratik Progresif Sarawak (SPDP) enggau raban G5 udah bisi ayan mandangka pemaik sereta pemereti deka begulai baru baka selama ti dipeda ngemeratka penegap parti sereta perintah Barisan Nasional.
Apin lama ke udah, raban G5 (Datuk Peter Nansian Ngusie, Datuk Sylvester Entrie anak Muran, Rosey Yunus, Paulus Palu Ngumbang enggau Datuk Dr.
Tiki Lafe) bisi ngenataika pengaga ati ngagai Tuai Pemegai Menua (TYT) Pehin Sri Abdul Taib Mahmud laban dipadu mangku pengawa nyadi TYT dalam surat kabar, tang maya nya ngena nama ‘Semua Raban Kelab BN Sarawak’.
Presiden SPDP Tan Sri William Mawan lebuh dikerandau pemberita pengudah kabinet menteri menua tu besumpah mangku pengawa di Kompleks Kunsil Nengeri (DUN) kemari, enda begilik tang agi baka selama.
Mawan ti mega Menteri Kanan enggau Menteri Pemansang Rama lebuh dikerandau madah, jaku pengaga ati ari raban Kelab BN Sarawak nya enda ngirauka ati iya.
“Enda ngawa, laban sida iya pan udah lama ngena nama nya, sida iya penyukung Barisan Nasional (BN).
“Pekara ke berat, iya nya singkang sida iya udah tu ila, enti singkang nya nuju kaul sereta penegap bekerejasama, lalu deka mulaika diri ngagai parti, kami (SPDP) nyendiaka jalai nyambut sida iya pulai baru…Nya ti dikemerat.
“Baka ke kala disebut aku suba, aku enggai ngingatka utai ke udah. Tang naka ke diatu, enti Kelab BN nya dikena sida iya laban udah lama ngena nama nya, aku ngadang tang enti sida iya udah mulaika diri baru ngagai parti, enda patut agi ngena nama bukai…Semina bisi seiti nama aja, iya nya SPDP enggau BN,” ku Mawan.
Ba kaul presiden nya empu enggau G5, iya madah diatu nyau pama agi, enda baka suba.
“Kaul kami nyau manah baru..Udah tentu maya agi charut, balat endar munyi laban lebuh nya nyadi pekara ke angat laban bebida penemu. Tau peda kita ari gaya kami lebuh nya ke munyi orang ke enda ulih bebaik agi tang taja pia, kami enda ngambi ati ba penyarut nya,” ku iya.
Pemerat deka bebaik pan laban politik kemaya hari tu, pemansang ke nyadi, bisi pemerat strategi sereta fokus nya nyadi pekara ke berat ba parti enggau BN.
“Tiap iku ari kami di komponen parti, kami bisi pengawa parti sereta menua ke patut diberi basa ari kami ti semina ngemeratka diri aja.
“Aku besedia deka betemu enggau sida (G5), aku ngamatka jaku aku. Diatu pan, kami udah bejaku baru. Nyangka kita (media) meda pan baka berupai endar,” ku Mawan lalu nandu baru pengawa G5 deka mulaika diri baru deka diputar enda lama agi.
Lebuh ditanya ngagai Mawan baru, ni maya G5 deka mulaika diri, ku iya: “Nadai besemaya ni maya, tang manah enti ulih diatur enggau jampat.
“Kami tu orang ke dikelala magang-magang, orang politik sereta seruran dikemataka orang. Tentu utai bansa tu narit ati rayat lalu dikemataka mensia mayuh…Kami patut betatika pekara bansa tu,” ku iya.
Berindik ari nya, seiku ari G5 ti mega nyadi Menteri Muda Tanggung Pengawa Raban Bansa enggau Menteri Muda Pemansang Industri (Kebun Mit), Datuk Peter Nansian Ngusie madah Mawan besetuju nerima sida iya pulai baru ke dalam parti.
“Bakani ku chara mulaika diri ngagai parti, awakka kami ke bisi besangkut paut mutarka nya, lalu ngambika Perintah Menua enggau Besai beratika chara kami mulaika diri.
“Nadai penanggul ba kami deka mulaika diri tang munyi ku aku tadi, bepanggai ba chara mulaika diri ngagai parti. Kami (G5) gaga ati ba pemansang ke diatu, lalu Mawan empu pan ngelaluka kami pulai baru,” ku Nansian.