NANGGUL PENGELIKUN: James (tengah) enggau bala bukai maya mansa parit ti balat kamah sereta enda ngerarat ai.
Taja suah mansutka sebana pengerusak penyikap ba flat Sibu Jaya lalu enda dikeibuh piak ti bekuasa
SIBU: Kaunsil Pemansang Pengawa Berumah (HDC) dipinta bejalaika tanggungpengawa enggau chakah agi bekaul pengelikun sereta ngemanahka perengkaguna ba flat Sibu Jaya ti mayuh udah jai sereta nanggul pengidup mensia ke nguan kandang nya.
Tu nyengkaum paip ti udah alit, parit ke enda dilasi sereta dinding flat bisi udah merekah.
Seiku ari bala ke diau ba flat nya ti enggai nama iya disebut
madah, sida dia bisi mayar urung RM14 dikena meresi sereta ngintu flat sida tang mengkang nadai asil dipeda.
“Kami baka ke nadai reti mayar pupu nya laban sida enda bejalaika pengawa enggau manah.
“Aku mega pechaya sida ke diau ba flat bukai udah mantaika pekara tu ngagai piak ti bekuasa,” ku iya.
Dulu ari nya, bisi 100 iku sida dia ngulu Program Beripai Ngintu Pemeresi enggau Munaska Denggi ke diatur Opis Kaunsil Menua Pesisir Sibu (SRDC) kilah ensana.
Nampung jaku iya baru, ku iya, laman flat dia mega udu kamah ti tau bendar nerenak sereta pengelekai igi penyakit baka denggi enggau muang ai.
Kelimpah ari nya, iya madah, sida ke diau dia suah ngatika diri besaup ngatur sebarang pengawa ke patut taja pan ke bendar, nya tanggungpengawa HDC.
Ba pekara ke sama, Chairman SRDC Kaunsilor James Laju Ambok maya dikerandau madah, iya udah kala nerima sebana bekaul enggau penusah ke bisi nyadi ba genturung pengentap pendiau dia.
Taja pan baka nya, iya madah, opis sida enda ulih mutarka semua pekara nya laban tebal agi penanggul ke nuntung sida dia ukai tanggungpengawa opis iya.
“Ke bendar, flat ditu dipegai HDC.
“Tanga ku ulih nyaup bala ke diau ditu mai pekara nya ngagai HDC,” ku iya madah.
Kelimpah ari nya, ku iya, opis ti bekaul mega anang ngelak kayu ke ditanam ba tisi jalai kelalu tinggi laban tau ngeruga pengelikun orang ti mansa tambah mega kelalu semak enggau kabel karan.