PROGRAM ‘HOME HELP SERVICES’: Fatimah bejadika program ‘Home Help Services’ di rumah Hamidah Ali ke alai Naim enggau Zainah diau di Kpg Kudei ditu.
Taja pan pengawa nya dikereja ngatika diri, iya puas ati mantu orang ke nadai bedaya
KUCHING: Pengawa nyaga sereta ngemataka orang tuai tauka sida ke nadai daya endang amat berat, lebi agi enti dikereja siang malam.
Tang pengawa bansa tu utai ke dikerinduka seiku orang ke gawa ngatika diri ari baruh Opis Menteri Pengintu Pengelantang Pendiau, Pekara Indu enggau Pemansang Ruang Bilik (KKWPK), Shafarina Azlin Ramje ke bejalaika pengawa ngatika diri, ngibun orang tuai ke sakit 4 jam sebulan.
“Enti nitih, aku bisi peransang diri, iya nya ngereja pengawa ke dikerindu aku, sereta rindu ke pengawa aku. Enti diberi pengawa ngibun orang sakit tauka orang tuai, utai bansa nya dikerinduka aku.
“Enda nya tusah nyaga orang tuai tauka orang sakit laban kitai sigi bisi pengerindu,” ku Shafarina Azlin ke setaun udah gawa enggau KKWPK tang dalam timpuh ngereja pengawa ngatika diri baruh opis menteri nya.
Seminggu sekali Shafarina Azlin nyaga seiku indu tuai Naim Ali, 81 taun ke diau enggau menyadi iya, Zainah Ali, 77 ba sebuah rumah ke diempu Hamidah Ali, menyadi iru dua iku diri menyadi nya.
Ngelama tu seduai menyadi diau di Kpg Tanjung tang enda memukai, seduai diasuh angkat ari rumah diri.
“Maya nya nadai orang mantu kami…Rumah nya suba endang rumah kami, tang diambi kaban kami. Nasit manah, laban menyadi iru kami, Hamidah nyanggup nulung kami,” ku Zainah madah lebuh dikerandau di rumah menyadi iru iya di Kpg Kudei Lama ditu, kemari.
Zainab madah sida menyadi 5 iku, tang tiga udah parai lalu bala menyadi sida nyengkaum seduai, sama enda belaki.
“Baka tu meh kami duai ngidupka diri, aka aku nya pan enda ulih angkat agi. Enti seduai agi dapat ngaga kuih ngambika bisi dijual tang diatu enda dapat agi, pedis pala patung,” ku iya.
Ba rumah tu mega alai Shafarina ngibun Naim, lalu kekadang mai Naim nurun ke sepital.
“Timpuh ngibun sejam aja, tang enti aku ka laun ari nya, enda gawa,” ku Shafarina Azlin.
Pengawa ngatika diri ngibun orang tuai enggau orang sakit tu pengawa ke enda begaji tang semina mantu orang bukai ke nadai orang ngibun.
Kemari, Menteri KKWPK Datuk Fatimah Abdullah bisi ngabas Naim di rumah Hamidah di Kpg Kudei semak ditu.
Ku Fatimah, pengawa ngatika diri baka nya digaga nengah ‘Program Khidmat Bantu di Rumah, alai servis baka ‘social outreach’ tu meri servis sukung ngagai orang tuai enggau orang ke timpang pendiau.
Pengawa ke digaga ‘sukarelawan’ tu baka nyendiaka pemakai, meresi endur orang nya diau, meli utai ke diguna orang nya, mai orang nya ngagai sepital tauka klinik, tauka semina enggau sida ngagai endur besembiang tauka bantu bukai.
“Nya alai, pengawa ke ngatika diri baka tu berat endar ba sida nembiak, lalu perintah endang meransang nembiak ngaga pengawa bansa tu. Opis menteri KKWPK tau alai sida iya ngerijista diri,” ku Fatimah.
BISI PENGERINDU: Shafarina Azlin ngibun Naim ti udah lama nadai daya.