KUCHING: Menteri Muda di Opis Kepala Menteri (Hal Ehwal Islam) Datuk Daud Abdul Rahman kemari malas timbal ke seruran dibantai ulih DAP ke minta deka meda pengawa ke digaga Tabung Baitulmal Sarawak (TBS) enggau silik.
“Kami sigi enda ditagang nyerahka akaun tauka barang ripot kami ngagai sida .
Kami bisi prosedur diri empu lalu nitihka Ordinan Baitulmal, endang kami enda patut meri penerang ngagai mensia mayuh laban iya utai ke enda tau dipandangka sengapa lalu semina kaban kaunsil aja ke tau, Majlis Islam tauka menteri ke bekuasa,” ku iya.
Iya madah bansa nya ngagai pemberita maya dikerandau pengudah nguluka Menteri Pengintu Pengelantang Pendiau, Pekara Indu enggau Pemansang Ruang Bilik, Datk Fatimah Abdullah bejadika ‘Program Home Help Services’ di Kampung Kudei Lama semak ditu, kemari.
Daud nandu baru, enti sida (DAP) agi enda lantang ati, sida iya tau ngeripot ngagai sida ke diberi kuasa nasat baka Opis Penagang Pengawa Makai Suap (SPR), ‘Suruhanjaya Integriti Agensi Penguatkuasaan’ tauka sida bukai.
“Sida iya anang enda ingat, iya nya TBS nerima Setipikit Beresi audit ari Opis Audit Menua 13 taun beturut-turut, lalu tu mandangka ejensi TBS enda kala salah kena ba ‘wang zakat’.
“Nya alai, enti bisi orang enda lantang ati, sida iya tau ngeripot ngagai orang tauka opis ke ngeluarka resit nya,” ku iya.
Baka nya mega enggau gerempung bukai di menua, TBS mega bisi hak enda mantaika sebarang pemadah ngagai orang mayuh.
“Bisi ke enda gerempung bukai meri akaun sida ngagai orang bukai baka nya aja? Pia mega kami, laban enggai ke iya disalah kuasa,” ku Daud.