KUCHING: Raban kaunsilor diperansang ngembuan penyiru seraya ngemeratka isu lalu mutarka penanggul nya ngambi tau nguntungka rayat enggau jampat.
Chairman Opis Kaunsil Kandang Bandar Padawan (MPP) madah, nengah chara nya opis kaunsil ulih meri servis ba tikas ke pemadu manah nitihka pinta enggau peneka rayat.
“Aku berengkah nemu, kandang pendiau Padawan ngembuan mayuh isu. Tiap kali kitai deka ngemutar tauka ngemujur tiap pekara, aku enggau raban kaunsilor deka duduk berandau.
“Kitai deka berandau lalu bejuraika pelin ari mendingka penemu raban kaunsilor ke alai kitai mega deka disaup sekeda ejensi perintah ke bekaul,” ku iya bejaku ngagai pemberita maya nemuai ngagai sebuah rumah di Lurung 6 Jalai Sungai Moyan – Segeh Batu Kawa ditu, kemari.
Iya madah, dikena nentuka MPP ulih meri servis ba tikas ke pemadu manah, kandang pendiau Padawan bisi 31 sitak pendiau lalu diarika 31 iku kaunsilor.
“Atur netapka tiap sitak pendiau diarika seiku kaunsilor dipeda enda bangat ngemedis tanggung pengawa sida.
“Ngarapka raban kaunsilor ulih ngatur pengawa sida enggau manah agi lalu mai sebarang penanggul enggau isu ke nyadi ba endur ke dipegai sida ngambika tau diperunding sereta diputar jampat,” ku iya.
Ba aum ninting bulan ke diatur Hari Empat tu tadi, Lo ngansak tiap kaunsilor numbuhka komiti diri ba kandang pendiau ke dipegai sida.
Raban kaunsilor MPP diarika 12 iku kaunsilor ari Parti Sa’ati Rayat Sarawak (SUPP) nyengkaum Lo ke nyadi chairman, Parti Pesaka Bumiputera Bersatu (9), Parti Progresif Demokratik Sarawak (3), Parti Rakyat Sarawak (3) enggau empat ke bukai ngarika gerempung ke ukai dikuasa perintah (NGO).