KABAN BELAYAN DIPERANSANG: Fatimah nemuai ngabas Naim ke benung sakit ti bela disempulang Daud (dua kanan duduk).
KUCHING: Enti dipertika penyampau orang ke ngatika diri ngereja pengawa ‘Perkhidmatan Sukarelawan Kebajikan’, lebih agi ba pengawa ngintu orang sakit tauka orang tuai ke nadai daya, tentu enda mayuh enti bepelasarka penyampau naka 21 Februari 2014, semina 104 aja orang ti Ngatika Diri ari Opis Pengintu Pengelantang Pendiau di serata menua tu.
Menteri Pengintu Pengelatang Pendiau, Orang Indu enggau Pemansang Ruang Bilik (KKWPK) Datuk Fatimah Abdullah madah enti diperatika statistik nyengkaum semua pemayuh orang ngatika diri ba 11 pelilih menua, semina 1,573 iku aja.
“Kelalu mimit, kami deka meransang mensia mayuh tauka komuniti kitai enggau orang ke ngatika diri…Lelaki pan tau,” ku iya madah pengudah ngabas dua diri menyadi ke udah tuai, Naim Ali, 81 enggau adik iya, Zainah Alu, 77 di Kpg Kudei Lama ditu, kemari
Ku Fatimah, Opis Menteri KKWPK endang meransang mensia mayuh ngereja pengawa ngatika diri ari baruh opis menteri tu lebih agi baruh program Meri Bantu di Rumah (Home Visit).
“Barang sapa ke deka nyadi ‘sukarelawan’ ngibun orang sakit, tauka mai sida iya nurun ke klinik, nukar ‘pampers’, lapik tilam tauka mantu sida iya ngemas rumah tau ngerijista ba KKWPK.
“Udah sida iya ngerijista diri, kami deka ngelatih sida iya, ari sukut baka ni tama ngagai rumah orang, baka ni bantu ke ulih ditulung kitai, bakani ku nukar ampin, servis mai orang tuai tauka Orang ke Timpang pendiau (OKU) ngagai Klinik,” ku iya.
Timpuh pengawa latih semina semingu, alai raban ke udah ngerijista tu deka diajar pemun, pemakai ke bepengerai enggau sekeda utai bukai. Udah abis latih, pelatih deka diberi setipikit.
“Reti nya ukai sebarang pengawa bansa tu, tambah timpuh orang ke ngatika diri mantu orang tuai tauka OKU semina sejam seminggu (reti nya dalam sebulan 4 jam aja).
Taun nyin tadi, kami meri kelala ngagai tiap iku sida ke udah ngereja pengawa ngatika diri baka tu, ke pengabis aktif,” ku iya.
Ba gaya bantu ke diberi KKWPK, iya madah seiku ari seduai menyadi nya sigi udah bisi bantu ari 2005, lalu udah nya ditukar ngagai Skim Bantu ke Orang Tuai (RM300 sebulan).
“Utai bansa tu sigi amat laban bisi sekeda orang tuai enggai diau di Rumah Pengandai Tuai (Rumah Seri Kenangan), bisi sekeda orang tuai kitai enda kala nikah, sekeda nadai anak lalu sekeda deka ngiru anak.
“Bila sida iya udah manggai umur tuai, nadai orang mantu sida iya. Nya alai, kami ngelaluka kaban belayan ke nyanggup nyaga sida tu enggau ati ke andal…Gaya penyiru bansa tu berat ba komuniti kitai,” ku iya.
Ba atur pengawa nya kemari, Fatimah bisi nemuai ngagai dua iku diri menyadi tuai, Naim enggau Zainah ke dibai diau enggau seiku menyadi iru sida, Hamidah Ali di Kpg Kudei Lama ditu.
Maya ngabas kena bulan Oktober 2013, Naim agi ulih bejalai tang diatu laban iya bisi kena sakit (asthma), iya lalu enda dapat angkat agi.
Nya alai, setipak enggau ‘Program Home Help Services di Rumah’, sereta sekeda pelatih udah dilatih ngereja pengawa tu, lalu seiku pelatih ari nya, Shafarina Azlin Ramje, dipadu nyaga dua iku orang tuai ya.
“Di Malaysia, kitai meransang orang tuai dijaga kaban belayan manah agi laban kitai beratika orang tuai tu ngasaika hari tuai sida iya dalam gaya ruang bilik ke lantang,” ku Fatimah lalu nambah ari Opis Menteri Muda, Datuk Daud Abdul Rahman bisi meri bantu,tilam enggau lapik tilam.
Kelimpah ari ya, ku Fatimah, barang sapa ke deka enggau ngereja pengawa ngatika diri baka tu tau ngerijista diri ba KKWPK.
Sama bisi nguluka atur pengawa nya kemari, Menteri Muda di Opis Kepala Menteri (Pekara Orang Islam) ti mega ADUN Tupong, Datuk Daud Abdul Rahman enggau Direktor Biro Wanita, Noriah Ahmad.