Anda di sini

Edmund: Penyulut nembiak berindik ari pengelandik pengajar

Advertisement

KE PENGINGAT: Francis (dua kiba) benung nyuaka tepa ngagai Edmund (tengah) seraya dikemataka sida bukai maya pengerami nya.

SRI AMAN: Pengajar ke landik seraya ngajar ngena chara baru ulih nempa nembiak ke nyulut setipak enggau juluk menua.

Pemesai Khas Kaban Parlimen Sri Aman, Edmund Pirang madah, pengajar ke ngembuan dua bengkah pekara nya deka seruran berunding pekara ke baru ti ulih mai ubah dalam sistem kena sida ngajar.

“ Kami meransang raban pengajar di menua tu ngubah chara ngajar ari ke lama ngagai chara  ke landik sereta ngajar ngena chara baru.

“ Chara nya ulih matak pengerindu bala nembiak belajarka sesebengkah mata pelajar”, ku iya.

Iya bejaku munyi tu ngarika Sapit Ketuai Dewan Negara Parlimen Malaysia, Senator Datuk Doris Sophia Brodie enggau MP Parlimen Sri Aman, Masir Kujat bejadika Pengerami Makai Lemai, Komiti Kepala Pengajar (MGB) Zon Undop ba Seri Simanggang Hotel ditu malam ensana.

Ku iya, patut landik mai ubah lebuh ke ngajar ngambika utai ti diajar sida ulih diterima nembiak.

“ Pekara tu beguna amat ngambika nembiak bisi pengerindu belajarka sesebengkah sabjek enti chara ke dikena ngajar nya berubah ngena chara baru”, pia ku iya.

Nengah awak nya, Edmund mega meransang bala apai indai ngemeratka pelajar anak sida laban sida nya meh ti dikearapka nyadi ketuai sereta reta ke pemandu beguna kena ngemansangka menua tu jemah ila.

“ Kita ke apai indai anang sesekali enda ngemeratka tanggungpengawa nyengulaka anak, laban ba dunya ke diatu pemandai nya beguna amat “, pia ku Edmund.

Ku iya, penyeranta ukai agi nyadika kebuah kita enda nyengulaka anak.

“ Mayuh orang ke seranta nyengulaka anak sida nyentuk ke tikas pelajar ke pemadu tinggi sereta teulihka pemujur ba universiti  “, pia ku iya.

“ Aku pechaya, tebal agi apai indai diatu nemu pemasai guna nganjung anak sida besekula laban semina nengah pemandai aja ulih ngubah chara pengidup kita.”

Lebuh ke ngenang sentang pemansang teknologi pemadah enggau penyambung (ICT), bala nembiak diatu patut nyikap diri enggau penemu nya laban beguna amat kena sida besemekih ngiga pengawa ila, pia ku Edmund.

Bela bisi ngulu pengerami nya, Chairman MGB Zon Undop, Francis Berayan Rengkang enggau bala pengajar bukai.

Beserimbai engagu pengerami nya, Doris, Masir enggau Menteri Muda Pemansang Menua Pesisir enggau Pengawa Berumah Sarawak ke mega ADUN Simanggang, Datuk Francis Harden Hollis sama bela meri belanja RM 5,000 ngagai MGU Zon Undop ngambika bisi kena sida bejalaika atur pengawa.

Advertisement