DIPENYADI: Manyin (dua kiba) ngerat riben kena bejadika balai raya nya seraya dikemataka Sinde (kanan), Toyong Sela (kiba) sereta sida ke bukai.
TEBEDU: Peranak menua pesisir dilalau ngambika enda lina seraya gagit enggau chara politik bandar, ku Menteri Pemansang Infrasruktur enggau Penyambung Dato Sri Michael Manyin Jawong.
Bejaku ba sebengkah pengerami Ketuai Begulai enggau Rayat di Kampung Tubih Behem enda jauh ari tu kena apin lama ke udah, iya nyebut enda ngipak berundingka menua pesisir deka ngasaika pemansang enti diarika raban penyakal.
“Ke bendar iya, menua pesisir agi begunaka pemansang ari perintah ngambika mayuh agi perengkaguna mensia mayuh ulih disediaka.
“Seraya endang amat kandang endur mengeri baka di Kuching mega nerima pemansang taja pan dipegai penyakal setegal Kuching nya pusat dagang enggau pusat opis perintah ukai setegal dipegai penyakal,” ku Manyin, ke mega ADUN Tebedu enggau mandal presiden PBB.
Nundaku Manyin, ‘politik pasar’ dikena sekeda raban politik ngambika nyukung chalun penyakal.
Bala nembiak ke belajar tauka gawa di bandar udah diparit ‘politik pasar’ ngelalau apai indai sida ngundi penyakal, ku iya.
“Enti kitai berati dalam sejarah, Kuala Lumpur endang di baruh pegai penyakal kenyau ari penumbuh Malaysia. Ke bukai baka Johor Bahru, Penang enggau Kuching mega dipegai penyakal diatu.
“Enggau nya perintah Barisan Nasional melanja bemiliun indah bebiliun ringgit dikena ngemataka bandar tu setegal sida nya pintu penama ungkup temuai enggau raban orang dagan beranakka puku. Penyakal nyangka idup di politik bandar tang kitai ditu anang terunda-runda, ku iya. Iya nyebut ba sitak Tedebu, udah bulih mayuh penguntung di baruh pegai Barisan laban diatu mayuh genturung pendiau udah disambung enggau jalai manah, bekal ai enggau lekterik.
“Pelaba aku nadai utai nya tau nyadi nyema baruh pegai penyakal,” ku iya nambah.
Ba kaul bukai iya meransang bala nembiak masuk latih pengelandik enggau setipikit nyema enda pandai dalam pelajar sekula.
Ku iya diatu mayuh peluang tebuka gawa ba industri ke bebesai di Samalaju, Bintulu, peminta ungkup pengereja pengawa ke ngembuan latih enggau setengan nya majak nambah.
“Ditu kitai bisi bala nembiak ke enda pandai dalam pelajar, tang jari sida idup. Nama kebuah enggai minta ba latih ngulihka setepikit dalam pengelandik, ke tau mai peluang kereja manah,” ku iya.
Seraya nya tuai raban bansa genturung pendiau Tubih Behem Toyong Sela enggau peranak dia beterimakasih ngagai perintah lebih agi ngagai Manyin ke udah ngemendarka peminta sida ngemanahka balai raya sida .
Iya mega minta Manyin nampung sepenggal nyadi ADUN Tebedu ba pengawa bepilih nengeri ngambika projek infrastruktur ulih dipenyadi di sitak nya.
Bisi datai mega D.O. Serian Sinde Mulling, mandal chairman Opis Kaunsil Pelilih Mit Serian Dr Simon Sindang Bada, tuai -tuai raban bansa enggau bala kaunsilor.
PENGELALU: Bala indu rumpas penuh ngena ngepan asal ari Tubih Behem ngayanka tanda asal sebedau bejadika pengerami.