BATANG PEKARA: Wilson nyuaka 10 pekara ngagai Alexander ba pengerami makai malam pengawa nutup Simposium Tuai Raban Bansa di Miri, ditu.
MIRI: Sebengkah pengarap ke besai udah dilempai ngagai perintah bekaul enggau peminta ungkup tanah pendam Dayak, nya sebengkah peminta ke dikutapka tuai bansa Dayak kenyau ari taun 2011 suba.
Ambis nadai meh tanah lima ikar umbas ungkup Pendam 1Malaysia ke balat bendar dipeguna serak ke diatu ku seiku Tuai Iban, Pemancha Wilson Siang Lim.
“Ditu aku nukik pekara tu baru lalu minta kasih ngagai Sapit Menteri Pemansang Menua Pesisir enggau Kandang Menua Datuk Alexander Nanta Linggi manggaika peminta nya ngagai perintah ngambika diperunding.
“Kami ngasaika pekara tu berat amat setegal pekara tu mantang bendar ungkup raban bansa Dayak ke diau di mengeri ,” ku terang iya .
Ku iya nyema bisi orang nya ninggal, naka meh pemalat penusah enggau pemedis sida ke ngempu pemati di mengeri bebaika antu ngagai genturung pendiau ke jauh di menua pesisir ngambika dipendam, tu nya kebuah ke terang bendar ba peminta nya .
Wilson Siang mega bisi nyebut Miri agi kurang penghulu lalu enggau nya minta diperundingka ari Nanta ngambika pekara nya tau dipetatika .
“Ditu kitai begunaka ambis mimit 10 iku penghulu – empat di Suai, seiku di Sibuti enggau bela seiku di Miri, Taman Tunku, Bandar Baru Permyjaya, Lutong enggau Lambir”.
Wilson Siang bejaku ba sebengkah pengerami ke diatur di sebuah hotel ke tebilang ditu , malam Hari Lima tu tadi .
Peminta nya dua ari 10 batang pekara ke dipansut ba Simposium Iban IPG Kampus Sarawak Miri ditu kena 28 Februari tu tadi.
Pekara nya dipesetuju semak 400 iku orang ke ngulu simposium sehari nya nyengkaum bala ketuai raban bansa enggau tuai rumah ari menua tu nyengkaum ari Miri, Sibuti, Subis, Kapit, Limbang enggau Sabah, pengajar enggau pematih jaku Iban di serata nengeri.
Simposium keterubah endar diatur tu berambaika leka jaku ‘Betungkatka Adat, Penemu Digenggam Sereta Pengarap Dikemerat’ diatur begempung enggau bala Ketuai Bansa Iban Miri, IPG Kampus Sarawak Miri enggau Bagi Iban RTM Miri.
Nanta di sempulang DO Miri Boniface Intang Apat, mandal Residen Miri Emang Oyo Emang enggau sekretari politik kepala Menteri Robert Laing Anyie.
Sekeda pofesyenal ke bisi ngulu simposium nya Padang Luna ke mega Penulung Direktor Unit Jaku Etnik, ba Bagi Pemansang Opis Menteri Pelajar Malaysia Putrajaya, Dr Chemaline Osup, Ketuai Opis Jaku Moden, Fakulti Jaku enggau Penyambung Universiti Pendidikan Sultan Idris, Tanjung Malim, Perak enggau Profesor Madya Dr Madeline Brema ari Universiti Kebangsaan Malaysia, Bangi.