KUCHING: Apai indai tauka pengaji ti deka ngambi orang gaji patut ngenukuka tikas pengerai sereta seruran meratika sida (orang gaji) dikena nyeliahka ari sebarang penusah ke tau nyadi.
Menteri Pemansang Orang Indu, Ruang Bilik enggau Raban Bansa, Datuk Seri Rohani Abdul Karim madah, nya dikena nentuka tikas pengelikun dalam ruang bilik kelebih agi anak ti ditinggalka enggau orang gaji.
“Kami (Opis Menteri) minta apai indai tauka pengaji di luar din ti ngambi orang gaji kelimpah ari ngemeratka tikas pengerai orang gaji, patut mega beratka pengelikun baka meratika ulah enti bisi nyelai ngambika sebarang penusah ulih diseliahka.
“Ijinsi patut meresa dulu latar belakang sereta meresa pengerai runding orang ti minta gawa nyadi orang gaji lalu orang ti ukai ngambi nengah ijinsi baka ari semenua, patut mansik dulu pendiau orang ti deka diambi nyadi orang gaji ba orang bukai ti semenua.
“Ijinsi tauka pengaji mega patut meri timpuh nguji dulu ba orang gaji ti diambi, baka kitai ti gawa ke diberi timpuh nguji dulu sebedau terus diambi gawa,” ku iya.
Rohani ti mega Kaban Parlimen Batang Lupar mansutka pekara nya lebuh ditanya bekaul enggau kes ti nyadi di Semenanjung Malaysia, seiku orang gaji munuh dua iku anak pengaji sebedau munuh diri.
Dulu ari nya Rohani ngulu pengerami ngangkat sumpah Tuai Pemegai Menua (TYT) Ketujuh Pehin Sri Abdul Taib Mahmud ti diatur ba Dewan Lapau, Kompleks Kunsil Nengeri ditu, kemari.
Kelimpah ari nya, lebuh ditanya bekaul enggau sekalika raban Orang Indu Parti Pesaka Bumiputera nyadi pengari parti nya maya Pengawa Bepilih Mit di Balingian ila, Rohani madahka pekara nya manah ke raban Orang Indu (PBB) enti diberi peluang.
Taja pia ku iya pekara milih pengari ba sitak Balingian bepanggai ngagai pemesai parti nentuka pengari ti patut.
“Pemesai parti (PBB) lebih nemu agi pasal ti patut dalam kabinet negeri sereta chalun tauka pengari ke patut.
“Kami tetap meri sukung ngagai barang sapa ti dipilih nyadi pengari di Balingan ngambika ulih menang (Pengawa Bepilih Mit) dikena ngenegapka Barisan Nasional di Sarawak,” ku Rohani ti nyadi Mandal Ketuai Orang Indu PBB.