Anda di sini

Tanka penegap jaku bansa diri

Advertisement

Iban diansak nguna jaku diri awakka terus maju ngipak segang pemansang

MIRI: Jaku Iban ukai semina kena bejaku aja tang, patut diangkatka nyadi jaku ba pelajar ngambika tegap.

Sapit Menteri Pemansang Menua Pesisir enggau Kandang Menua Datuk Alexander Nanta Linggi madahka, bansa Iban empu patut regas agi ba sekeda pekara ke bekaul enggau chara ngena jaku asal nya ngambika sida ulih majak maju setipak enggau pemansang ke diatu.

“Taja pia, orang ke pepandai ari bansa Iban suah agi deka bejaku ngena jaku bansa bukai lebuh ti ngenang pekara ti bekaul enggau ulah sereta pengidup besesehari enti dibanding enggau jaku asal sida empu.

“Ba aku, nya nadai salah, tang enda engkeman laban pekara ke bekaul enggau pengidup sesehari kitai (Iban) manah agi dikejakuka ngena jaku kita empu ngambika mantik didinga,” pia ku iya.

Nengah chara nya, ulih matak pengerindu nembiak rebak baru bansa Iban terus ngambika sida landik ba jaku diri enti dibanding enggau jaku bansa bukai, ku iya.

Iya bejaku munyi tu nengah teks jaku iya ti dibacha DO Miri, Boniface Intang Apat lebuh ti bejadika  Simposium Ketuai Bansa Iban Pelilih Miri 2014 di Dewan Muhibbah, Institut Pematih Pengajar (IPG) Kampus Sarawak, Miri ensana.

Sama bisi  ngulu simposium nya Chairman Pengatur pengawa Pemancha Wilson Siang Lim, Ketuai Penulung Sekreteri Opis Menteri Pemansang Rama , Sebastian Sujang, Menijer Stesyen Radio Televisyen Malaysia (RTM) Miri Ramli Junaidi enggau Francis Mancha ari Sektor Pemansang Akademik Opis Pelajar Menua.

Simposium keterubah endar diatur tu berambaika leka jaku ‘Betungkatka Adat, Penemu Digenggam Sereta Pengarap Dikemerat’ diatur begempung enggau bala Ketuai Bansa Iban Miri, IPG Kampus Sarawak Miri enggau Bagi Iban RTM Miri.

Maya simposium nya, bisi tiga iti keretas kereja deka dipejuraika baka ‘Pemansang Bala Tuai Raban Bansa Nemu Sistem Jaku Iban Ti Dikena Di Sekula,’ ‘Tangkup Pengawa Bala Tuai Raban Bansa Ngemansangka Pelajar, Adat & Pengarap’ enggau ‘Tangkup Pengawa Bala Tuai Raban Bansa Ngemansangka Penatai Pemisi.’

Tiga iku tukang licha ti dikangau bejuraika keretas kereja nya baka Padang Luna ke mega Penulung Direktor Unit Jaku Etnik, ba Bagi Pemansang Opis Menteri Pelajar Malaysia Putrajaya, Dr Chemaline Osup, Ketuai Opis Jaku Moden, Fakulti Jaku enggau Penyambung Universiti Pendidikan Sultan Idris, Tanjung Malim, Perak enggau Profesor Madya Dr Madeline Brema ari Universiti Kebangsaan Malaysia, Bangi.

Bisi 350 iku orang ngulu simposium sehari nya nya nyengkaum bala ketuai raban bansa enggau tuai rumah ari menua tu nyengkaum ari Miri, Sibuti, Subis, Kapit, Limbang enggau Sabah, pengajar enggau bala nembiak ti belajarka jaku Iban.

Advertisement