Baka ninga lalau ari Adenan dikena nyerakup sereta ngiga chara ti pemadu manah mutarka penanggul ditapi parti, ku Peter Chin
KUCHING: Parti Sa’ati Rayat Sarawak (SUPP) begunaka penemu orang luar baka Kepala Menteri (KM) Tan Sri Datuk Amar Adenan Satem, dikena nyerakup sereta ngiga chara ti pemadu manah mutarka penanggul ditapi parti.
Pekara nya dipadahka Presiden parti, Tan Sri Peter Chin lebuh ditanya pengarang berita kemari sekalika bisi minta penemu tauka runding ari Kepala Menteri ke baru, mutarka penanggul ditapi parti.
Iya ngarapka nengah iring Kepala Menteri ke baru, parti komponen diberi peluang gawa enggau iya (Adenan).
“Au. Munyi ti kala dipadahka aku sebedau tu, kami endang ngandal tauka arapka dibaruh iring iya parti komponen deka diberi peluang gawa begulai enggau iya.
“Lalu reti iya, sebarang penanggul ditapi parti komponen iya (Adenan) deka mantu mutarka sebarang penanggul nya.
“Aku ngasaika ukai semina beguna penemu dalam parti aja, tang mega begunaka orang ari luar kelebih agi baka Kepala Menteri nyerakupka parti (SUPP) sereta ngiga jalai ti pemadu manah (dikena mutarka penanggul).
“Iya (Adenan) madah, iya deka betemu enggau aku, lalu aku deka betemu enggau iya. Tang iya nadai nimpuh maya,” ku Chin lebuh dikerandau pengarang berita pengudah ngulu pengerami ngangkat sumpah Tuai Pemegai Menua (TYT) Pehin Sri Abdul Taib ti diatur ba Dewan Lapau, Kompleks Kunsil Nengeri ditu, kemari.
Penyarut nyadi dalam SUPP bepun ari penumbuh dua bengkah raban ti betuaika Presiden SUPP Tan Sri Peter Chin enggau Chairman SUPP Sibu Dato Sri Wong Soon Koh.
Penyarut nya berupai nyengenda maya baum tiga taun sekali (TDC) parti nya taun 2011. Pemutus TDC nya, Chin dipilih nyadi Presiden nganti Tan Sri George Chan ti ningkilka diri ari politik ketegal alah maya pengawa bepilih nengeri (2011).
Nambahka nya lebuh ditanya sekalika bisi nerima timbal ari Opis Pengerejista Gerempung (ROS), iya madahka bedau nerima sebarang berita ari ROS.
“Surat Tunjuk Sebab udah dianjung lalu diatu aku ngasaika ROS patut malas,” ku iya.
Parti SUPP ti nerima surat ari Indu Opis ROS di Kuala Lumpur ti ditulis haribulan kena 6 Januari diterima parti kena 8 Januari madahka pampang Bekenu enggau Piasau dikinsil pengerejista.
ROS dalam surat ke bukai mega minta SUPP Pusat nyaut surat ti madahka kebuah parti nya enda patut dikinsil pengerejista.