Anda di sini

Penanggul ai rayat di Sungai Asap bedau teputar, ku Abun

Advertisement

KUCHING: Bekal ai ngagai Palan Pengentap Pendiau Sungai Asap, Belaga ke diwan peranak Orang Ulu ari raban bansa Kayan, Kenyah, Penan, Ukit enggau Lahanan mengkang keruh sereta suah putus ke alai perintah dipinta mutarka pekara nya enggau lengkas.

Nitihka penerang berita ke dipansut Sekretari Parti Keadilan Rakyat (PKR) Hulu Rajang Abun Sui, seiku peranak Uma Bawang, Ujang Bengo madahka perintah kala besemaya deka ngemanah sereta nganti paip ai ke lama ngagai ke baru tang nyentukka diatu semaya ke dipansut ba taun 2010 nya lalu enda dikeamat.

Kelimpah ari nya, mayuh penanggul bukai bisi ditapi ketegal suntuk bekal ai kelebih agi ba maya ngintu Hari Krismas enggau Gawai tauka maya bisi pengawa begempuru baka ke ngintu pemati.

Ku Abun, peranak Sungai Asap enggai jadi enda meli ai mineral ngambika tau diirup tang ukai semua peranak menua nya bisi pemisi meli ai mineral.

“Kitai irauka pengerai tubuh enggau pengidup peranak menua nya enti perintah enda  mutarka penanggul sida,”ku Abun.

Kitai minta perintah bejalaika atur ngemanah sistem bekal ai ngagai palan pengentap pendiau  Sungai Asap enggau lengkas, tandu iya ba surat penerang nya.

Lima belas genturung pendiau dituntung penanggul iya nya Uma Bawang, Uma Nyaving, Uma Kelap, Uma Lahanan, Uma Belor, Uma Penan Talun, Uma Balui Liko, Uma Juman, Uma Balui Ukap, Uma Daro, Uma Badeng, Uma Lesong, Long Jawe, Uma Ukit enggau Uma Bakah.

Advertisement