SIBU: Injin api meletup ketegal pun penyadi angus ba dapur semilan buah pintu di Rh Uching Demong di Jalai Nibong-Tada kena malam Hari Empat tu tadi.
Ku Tuai Rumah, nadai kes bebadi nyawa dalam penyadi penusah angus pukul 9.15 malam nya tang 52 runag bilik lenyau rumah endur diau.
“Aku benung madamka suis injin api ba belakang dapur tang enda memukai iya (injin api) meletup,” ku Uching.
Ku iya, api nyerarai enggau jampat lalu dalam timpuh setengah jam semua dapur rumah panjai sida lengis diempa api.
“Kami nadai daya madamka api laban resu api kelalu panas lalu nyerarai enggau jampat berengkah ari dapur sesepiak,” ku iya.
Ku iya, semua dapur ba rumah panjai nya digaga ngena separuh kayu enggau bisi ngena semin.
Taja pia, ku Uching, semua mansa sempat nyelamatka reta tengkira sida.
Dua injin pemadam api ari Kanowit enggau Sibu datai ba tempat penyadi pukul 10.10 malam lalu operasi madamka api ngetu urung pukul 10.23 malam.
“Nasit manah bilik peninduk enggau bilik kami enda angus,” ku Uching.
Kaban Kunsil Nengeri (ADUN) ke suba Ngemah Gabriel Adit pulai ke rumah panjai iya pagi ensana ngabas penusah angus nya.
Pia mega, rumah panjai 20 pintu Rumah Jemaiah Keling nyauka ambis lengis diempa api ba kes penusah angus ba Hulu Naman, Kanowit urung pukul 1.30 lemai ensana.
Ku tukang pengerembai berita Ketuai Balai Bomba enggau Penyelamat Kanowit, Jackson Anyie madah bisi 21 iku kaban bomba nyengkaum Balai Bomba Kanowit, Balai Bomba Bintangor enggau Tim Bomba Sukarela Julau begeguai ngelawa tempat penyadi nepan dua kerita pemadam api enggau sebuah entukar ke bukai sepengudah nerima kangau telefon pukul 1.50 lemai.
Kerita bomba keterubah datai ba palan penyadi urung pukul 2.13 lemai.
Ku iya, api dipelabaka bepun ari dapur sebuah bilik di rumah panjai nya.
“Pansik tumu tetmuka pun penyadi dipelabaka datai ari dapur sebuah bilik rumah panjai nya ketegal ilap,” ku Jackson.
Taja pia, nadai kes bebadi nyawa diriput nyadi.
Pun penyadi enggau pengerugi agi dipansik.