KUCHING: Chairman Parti Keadilan Rakyat (PKR) Nengeri Baru Bian ngakun sitak Dewan Undangan Nengeri (DUN) Balingian semampai nyadi kubu kuat Barisan Nasional (BN) Sarawak.
Taja pia ku iya, PKR enda alah semengat lalu deka nguji enggau pengabis daya ngulihka sukung ari orang ngundi di sitak nya.
“Kitai ngakun sereta nemu ba pengawa bepilih mit (PRK) Balingian ke deka datai PKR pedis deka nyatup BN.
“Sitak Balingian entara kubu kuat BN Sarawak tang pekara nya enda ngelemi semengat kitai ke alai kitai mega pechaya sebarang pekara tau nyadi dalam politik,”ku iya ba siti aum pengarang berita pengudah ngulu aum parti ke diatur ditu, kemari.
Baru ke mega ADUN Ba’Kelalan nambah, pengawa bepilih mit nya ila deka nyadi penentu ikas sukung ari rayat ngagai kepala menteri ke baru dichiri.
Ku iya, atur beganti kepala menteri enggau tuai pemegai menua sereta ditambah enggau pangka ekonomi ketegal rega barang ti majak nambah deka nyadi sekeda isu ti deka dibai diperunding rayat kelebih agi maya bekimpin.
Kelimpah ari nya, bepelasarka peneleba ba pengawa bepilih besai taun 2011, Baru madahka PKR deka ransing agi bejalaika pengawa nerang manifesto parti ngagai rayat.
“Kitai patut ngerapat rayat suah agi lalu nerangka enggau silik reti manifesto PKR. Tu meh penguji ke patut ditempuh kitai.
“Pengawa bepilih mit tu meri kitai sekali agi awak ngerapat rayat, nerangka manifesto sereta ngulihka sukung.
“Kitai pechaya, enti mayuh orang udah meretika manifesto, PKR deka bulih mayuh agi sukung,” ku iya.
Ngenang senentang chalun PKR ti ngarika Pakatan Rakyat (PR), Baru madah diatu mengkang bisi dua iku nama ke alai pemutus sapa bagi chalun ba Balingian semina dipansut pengudah pansik dipejalai.
Aum PKR kemari bejuraika senentang pengawa bepilih besai dalam PKR ti deka diadu ba bulan April enggau Mei.
Baru netapka 29 Mach endur maya ke penudi nganjung nama chalun ti deka ngerebut penuduk besai dalam parti iya nya ari presiden nyentukka ngagai raban kunsil besai. Pengawa bepilih deka diatur ari 25 April ngagai 11 Mei.
Ungkup Sarawak enggau Sabah, maya penudi nganjung nama chalun ngarika pampang diputus kenaka 13 April ke alai pengawa bepilih deka diadu ari 25 ngagai 27 April, tandu iya.