KUCHING: Bepelasarka peneleba enggau pemintar Kepala Menteri baru (Tan Sri Datuk Amar Adenan Satem), Sarawak deka ngerembai maju, ku Mohd Nizar Mohd Najib (gambar), 36, anak Menteri Besai Datuk Seri Najib Tun Razak.
Lebuh dikerandau, iya ngarapka nengah ketuai ke baru kaul Sarawak enggau Semananjung Malaysia majak rapit.
“Sarawak udah nyadi penyukung kuat perintah. Kami ngarapka kaul positif enggau tegap entara Semenajung Malaysia enggau nengeri tu deka majak rat ba taun-taun ke deka datai.
“Aku meri selamat bejalaika pengawa enggau pengabis manah ngagai Kepala Menteri Baru. Nengah peneleba enggau pemintar, Sarawak ulih maju dibaruh pegai iya (Adenan),” ku Nizar seraya madahka diri datai deka meda pengerami besejarah Sarawak.
Kemari hari besejarah Sarawak lebuh Tan Sri Datuk Amar Adenan Satem dichirika nyadi Kepala Menteri Sarawak kelima, nganti Pehin Sri Abdul Taib Mahmud ti badu megai pengawa Kepala Menteri (Keempat) pengudah 33 taun megai nengeri tu.
Adenan ti disempulang bini iya Puan Sri Jamilah Anu ba pengerami, nerima surat chiri sereta ngangkat sumpah di mua Tuai Pemegai Menua Tun Datuk Patinggi Abang Muhammad Salahuddin ti disempulang Toh Puan Datuk Patinggi Norkiah.
Nambahka nya, Menteri Pemansang Rama ti mega Presiden Parti Demokartik Progresif Sarawak, Tan Sri William Mawan madahka diri bepengarap besai Adenan ulih nampung sereta bejalaika pengawa nyadi kepala menteri (KM) ti ditinggalka Taib.
Iya arap bendar Adenan ulih mutarka macham isu ke nyadi di nengeri tu.
“Bepelasar sereta ngembuan peneleba ti chukup mayuh, aku pechaya ulih mutarka macham isu nyengkaum isu tanah enggau ke bukai ngena pengelandik enggau pemintar iya,” ku iya.
Kelimpah ari nya, Dato Hanifah Taib-Alsree mega sepenemu, arap bendar Adenan ulih nampung pengawa ti ditinggal ke apai iya (Taib).
“Aku arap bendar Tuhan ngelindung sereta nunjukka iya bejalaika pengawa, kitai endang arap iya ulih nampung pengawa ti dilengkaka Pehin Sri. Aku ngarapka ti pemadu manah ngagai iya (Adenan),” ku iya.