NITIHKA ATUR: Pengawa nyadung baucher BR1M 3.0 di Sibu kemari dipejalai enggau mujur.
SIBU: Tebal peranak menua ke mujur nerima Bantu Rayat 1Malaysia (BR1M 3.0) ba sitak tu lantang ati bepun ari chara meri bantu nya dikemanahka agi ari taun ke udah.
Pengawa nyadung bantu nya nengah akaun bank ngemuntangka mensia mayuh lebih agi orang tuai ari ke berintai lama nganti baucher.
Pagi kemari, ba Dataran Bandar Sibu Fasa 1, dijir penerima BR1M 3.0 ke deka ngambi baucher enda mayuh enti dibida sebedau tu.
Tiaw Sekalai, 59 taun, ari Rumah Steven Bana, Tutus, Igan, madahka diri sebedau datai ngambi baucher nangi bendar berintai kelalu lama.
“Tu keterubah iya aku nerima BR1M. Suba aku bisi ninga mayuh orang sebana kelalu lama berintai ngambi baucher.
“Tang aku berasai lantang ati laban maya datai kitu rintai bala penerima enda mayuh,” pia ku iya madah maya dikerandau pengarang berita, kemari.
Tiaw mega madah berasai temegah ati laban bela ampit nerima pemeri perintah nya sereta ngarapka perintah mengkang meri BR1M nyentuk ke jemah ila.
Seiku agi penerima BR1M, Binit Kayan, 41, asal ari Rumah Kelukut, Nanga Telesa, Sungai Mujok, Julau, madah penyampau BR1M ke diberi ari RM500 ngagai RM650 serak tu tau bendar ngelempungka tating pengidup berebak enggau belanja pengidup kemaya hari ti majak niki.
Ba iya, ku Binit, bantu nya ngelempungka belanja tiga iku anak iya ke benung besekula.
“Ukai semina nya aja, baka aku ke nyuwa ba mengeri endang bekenaka puku belanja ti besai baik nya ke pakai, bayar karan enggau ai tauka belanja bukai.
“Nya alai, aku berasai gaga laban tu sebengkah ari chara dikena perintah nyaup ngelempungka tating pengidup rayat,” ku iya ti gawa ba tabut.
Ngenang chara nyadung bantu nya nengah akaun bank, seiku agi penerima, Nibi Aying, 29, madah mayuh orang rumah panjai baka sida ke tuai enda nemu chara baka ni mutarka pekara nya lebih agi nyema nadai orang ngulu.
Ku iya, bisi mega enda ampit nemu berita bantu nya ulih diambi nengah akaun bank.
“Nyangka dudi hari sebengkah chara ke engkeman agi ulih diatur.
“Pekara tu ukai semina nyadi ba sida ke tuai aja tang nyengkaum orang bukai ti gawa jauh,” ku iya seraya madahka diri mega laun nemu chara baru nya laban ke gawa ba kem batang ti jauh dalam kampung.
Taja pan baka nya, Nibi ari Sibu Jaya, muji chara baru perintah nyadung BR1M 3.0 nya.
Iya mega meri besai terima kasih ngagai perintah laban semampai berundingka chara dikena mantu nyungkakka pengidup rayat.
Dulu agi ari nya, Menteri Kaunsil Kandang Menua enggau Pemansang Raban Bansa Dato Sri Wong Soon Koh bejadika pengawa meri BR1M 3.0 bagi sitak Sibu.
BR1M diberi ngagai ruang bilik ti bepenatai pemisi baruh ari RM3,000 ditiki ari RM500 sebedau tu ngagai RM650.
Sida ke bujang iya nya berumur 21 taun ke atas ti bepenatai pemisi baruh RM2,000 ditiki ari RM250 ngagai RM300.
Ba BR1M 3.0 serak tu mega, ruang bilik ti bepenatai pemisi ari RM3,000 ngagai RM4,000 bela diberi RM450.