KUCHING: Seraban polis mujur nangkap dua iku lelaki ti dipelaba ulih mantu pansik bekaul enggau kes bunuh seiku sub-konteriktor ti diperitaka nguji nagang lori iya dichuri di Taman Stutong Indah ditu dini hari ensanus.
Sapit Kepala Polis Pelilih Mit Kuching Superintenden Entusa Iman madah, kededua iku orang ti disangka beumur urung 50 taun nya ditangkap di kandang mengeri Kuching bekaul enggau kes nya ti dipansik ari baruh seksyen 302 Kanun Keseksaan.
Nitih penerang ari iya, dua iku ti disangka nya ngembuan rikod ngereja penyalah ngelanggar undang-undang nyengkaum kes enchuri perengka pengangkut.
“Kami bisi nangkap dua iku iya nya seiku lelaki China enggau seiku lelaki Melayu ti beumur urung 50 taun ngambika ulih mantu pansik bekaul enggau kes pemati seiku sub-konteriktor ti dipelaba nguji nagang lori iya dichuri pagi nya (ensanus),” ku iya.
Iya mansutka penerang nya dalam aum pengarang berita bekaul enggau kes nya ba Indu Opis Polis Pelilih Mit (IPD) Kuching lemai ensana.
Ngenang kes nya, Entusa madah, sub-konteriktor iya nya Chang Tung Peng, 45, kena bunuh ketegal ditancham ngena utai tajam ba tubuh iya lebuh nguji nagang lori iya dichuri urung pukul 4.45 pagi nya.
Bini iya (Chang) nemu insiden nya lalu beguai nganjung iya ngagai sebuah sepital peribit ti semak sebedau iya (Chang) disahka mati udah nya.
“Saksi ba endur penusah nya nyadi madah, iya (Chang) ditemu begaring sereta dibalut darah di atas jalai alun urung 50 meter ari rumah iya.
“Iya (Chang) terus dianjung bini iya ngagai sebuah sepital peribit ti semak dia tang disahka mati ketegal ditancham ngena utai tajam ba tubuh, pala enggau jari,” ku iya.
Kelimpah ari nya, iya madah, lori mujur ditemu iay nya urung 80 meter ari penusah nya nyadi ti dipelabaka ditinggalka orang ti disangka sebedau ngelarika diri.
“Sama bisi ditemu dalam lori nya sebilah pisau ti disimpan ba tengah penuduk di mua lori nya.
“Taja pia piak kami agi mansik sekalika pisaunya dikena dalam kes nya tauka enda laban dipeda ngena mata kasar baka ti nadai bekau darah ba mata nya,” ku iya.
Bejaku baru iya madah, taja pia motif bunuh nya agi dipansik.
Sama bisi ngulu aum pengarang berita nya Mandal Ketuai Polis Pelilih Mit Kuching Superintenden Fauzilan Abdul Aziz enggau Ketuai Bahagian Siasatan Jenayah Daerah DSP Lim Bak Phai.