KUCHING: Penyampat bantu ari Opis Kaunsil Bandaraya Kuching Selatan (MBKS) ngelantangka ati komuniti Tabuan Dayak ditu maya genturung pendiau nya ditinggang penusah ampuh bah ngenyit berebak enggau ujan ke enda ngetu nyentuk dinihari, hari Lima tu tadi.
Seiku kaban Kaunsil MBKS Manjeet Kaur Sidhu, entara orang keterubah datai ba endur nya kena hari Enam (pengudah ampuh bah) lalu meda enggau mata diri, utai ke ngasuh balat kena ampuh bah lalu udah nya berandau enggau komuniti ke diau dia ke benung kiruh meresi rumah sida iya nyengkaum bejembuika rengka ke basah laban bah ngenyit nya.
Kampung Tabuan Dayak nyadi sebengkah genturung pendiau ke suah betapi enggau ampuh bah ngenyit tiap kali kena ujan lebat, lalu mensia mayuh ke diau di genturung nya nyangka kebuah kena bah ngenyit ke pengabis balat dalam kandang 20 taun tu ketegal pengawa ngaga projek besai di belakang Tabuan Dayak (di Jalai Wan Alwi) nya dipelaba nyadi pengepun.
Seiku ari komuniti genturung pendiau nya madah, sebedau projek ngaga rumah tauka pasaraya nya, konteriktor dia kala besemaya deka ngemesaika Sungai Tabuan alai sida iya ngaga projek nya, ngambika enda ngenusahka mensia mayuh lebuh tasah ampuh bah ngenyit.
Tang datai ke sehari tu, janji tinggal janji, komuniti di Tabuan Dayak majak tusah ati tiap kali ujan lebat, sida iya ke nanggung semua penusah nya.
Nya alai, tiap kali hari ujan lebat, Kampung Tabuan Dayak nyadi endur keterubah betapi enggau penusah ampuh bah ngenyit, ukai semina nuntung rumah ke diau dia, tang datai ba jalai alun lalu ngujungka Sungai Tabuan ke sempit nya, enda ulih nguan ai kelalu mayuh lalu ngampuhka jalai sereta rumah mensia dia.
Seiku ari komuniti ke diau di Kampung Tabuan Dayak, Dorothy Gregory madah, taja pan Kampung Tabuan Dayak suah endar dituntung penusah bah ngenyit, rumah sida iya entara ke pengabis penudi kena ampuh, tang ampuh bah ngenyit ke nyadi hari Lima tu tadi, ke pengabis balat kala nyadi seumur hidup iya.
“Aku baru ngasai penyamai bekau udah ampuh bah ngenyit kena 1 Januari tu tadi, lalu dituntung baru bah ngenyit hari Lima tu tadi. Kumbai aku, lebuh maya 5 Januari 2012 balat, enda nemu ke baru tu tadi balat agi ari nya,” ku Dorothy.
Iya melabaka bah ngenyit nya ukai ketegal parit di genturung pendiau dia enda ngeraratka ai enggau manah, tang jangka iya ketegal projek ngaga rumah tauka pasaraya belakang genturung pendiau (ba Jalai Wan Alwi) ke nyadi pengepun, nuntung genturung pendiau alai komuniti Dayak ari Saratok, Betong, Simunjan belabuh datai lalu nirika ruang bilik dia.
Taja pan parit ngembuan kelalu mayuh uras nyangka kebuah tau mai bah ngenyit, tang komuniti di genturung pendiau nya madah, pengawa MBKS enda meresi parit nya tau mega nyadi kebuah.
“Maya kami kena tasah, tauka maya kami kompelin baru MBKS datai, tang enti enda dikompelin, sida iya jarang kitu meresa endur tu,” ku iya.
Lebuh kaban Kaunsil Manjeet meresa parit ba genturung pendiau dia, iya madah nyangka siti ari kebuah bah ngenyit selalu nyadi laban parit dia nadai jalai ai pansut ngagai Sungai Tabuan, lalu iya semina begelumu ba sebengkah endur, nya ke tau ngasuh ampuh bah ngenyit.
“Aku udah bejaku enggau Datuk Bandar pasal penusah tu, lalu udah tu ila, kami deka bejuraika pekara nya, baka ni deka ngaga besai agi parit nya. Laban bisi sekeda jalai parit nya bisi ngerampit tanah orang bukai. Kami enda tau sebarang nyangkul tanah orang laban patut nitih undang-undang.
“Enti ngemesaika parit nya ba tanah orang bukai, nyangka nya ukai bidang kuasa MBKS, tang nyangka opis kandang menua ke besai agi kuasa tau berandau enggau orang ke ngempu tanah nya, ngambika meri awak ngagai kami ngemesaika parit di genturung pendiau tu,” ku iya madah lebuh dikerandau pemberita ditu apin lama ke udah.
Kelimpah ari nya, seiku agi komuniti ke diau di genturung pendiau dia madah, iya empu kala nulis surat ngagai Datuk Bandar MBKS enggau Opis Parit enggau Entali Ai (DID).
Opis DID kala datai kia, ku indu nya, tang semaya DID deka ngemesaika parit nya datai ke sehari tu pan enda kala diatur.
Albert Merikan, seiku komuniti ke diau di Tabuan Dayak dia madah, ari penusah bah ngenyit ke nyadi tu tadi, iya ngarapka opis kandang menua ulih mantu komuniti di Tabuan Dayak, ngemesaika agi parit ba endur nya lalu tau mega bejaku enggau konteriktor kena gaga projek ba Jalai Song, ngamatka semaya sida ti deka ngemasaika Sungai Tabuan nya.
Tuai Kampung (TK), Kampung Tabuan Dayak (Paya) Peter Encharang lebuh dikerandau madah, iya udah nganjung surat ngagai Indu Opis Parti Sa’ati Rayat Sarawak (SUPP) baka ke dipadah seiku pemesai parti nya, tang datai ke sehari tu nadai kala dikemerat.
“Sida MBKS bisi datai, tang nadai ngaga nama-nama. Surat aku ke penudi endar nuju MBKS pasal kompelin jalai enggau sekeda utai bukai pan bedau di atur.
“Aku ngarapka penanggul tu ulih diputar enggau jampat, laban enda alah tiap kali hari ujan lebat, kami ditu irau belama enggaika kena ampuh bah baru,” ku Peter.
Naka ke diatu, berebak enggau penusah bah ngenyit hari Lima tu tadi, MBKS semina udah muai uras ari parit lalu bisi udah nebas nisi parit nya aja.