KAMI MEGA SIRU: Chairman Pengatur Malcolm Yap (tujuh kanan) ari Raban Nembiak Sekaut Kuching Ke-dua nyuaka barang ngagai pengari Hope Place Heidi Law (tengah ). Bisi enggau mega (ari empat kiba) Ketuai Nembiak Sekaut Jeffrey Wee, Ketuai Nembiak Sekaut Then Ik Wei, Ketuai Nembiak Sekaut Cindy Lau, direktor Lodge Group of Schools Rijeng Jahet, penulung chairman pengatur Ng Tze Tung (enam kanan) enggau kaban komiti bukai.
DATAI BARU ILA: Direktor Sekolah Antarabangsa Lodge James Ling (kiba) ngenataika terima kasih ngagai Wan ke udah bekunsi peneleba iya enggau bala nembiak sekula.
PENGGI KAMI: Prinsipal Sekolah Rendah Kebangsaan Lodge Stanley Chong (tengah) nyuaka pemeri RM1,500 ngagai pemungkal Hope Place Kelvin Wan (kiba). Diperati ketuai Kelab Jaku English Charlene Sim (kanan).
KUCHING: Taun Baru tu muka lambar baru ba pengawa ke dipejalaika Gerempung Pengasih Hope Place lebuh pemungkal, Kelvin Wan diundang ngenataika licha iya di Sekolah Rendah Kebangsaan Lodge pun minggu nyin tadi.
Bejaku ngagai The Borneo Post ensana Kelvin madah, kereja pengasih ke diatur Hope Place matak pengerindu ati pengajar Kelab Jaku English sekula nya, Charlene Sim lebuh projek ‘Charity Without Borders’ ke dipejalaika begulai engau ‘Kelab Cabaran Pacuan 4 Roda Bintulu’ dipansutka ba lambar mua surat berita Bulan Disember taun nyin tadi.
“Kenyau ari nya, iya semampai nganti berita bekaul enggau kami lalu nampal kerat surat kabar ba papan notis ngambika tau dibacha bala nembiak sekula,” ku iya.
Lebuh Charlene ngundang iya meri licha di sekula nya, Kelvin naka iya pengagit deka bekunsi peneleba bekaul enggau pegawa begulai enggau bala nembiak sekula.
“Aku enda meh nyangka pengawa ke diatur ngelama tu nya diperati lalu bisi meri empas ke dalam ngagai mensia mayuh.
“Pekara ke ngerinduka ati mega, sida ngundang aku sekali agi ngenataika licha ngagai bala nembika sekula sekondari mega,” ku iya.
Kelvin ngena awak 30 minit ngenataika licha iya seraya bulih timbal ke ngenyinuka ati lalu tebal agi sida ke mending licha nya labuh ai mata pengudah mending peneleba ke dipekunsika.
“Seiku ari nembiak ke mending licha nya nelai ngagai aku, sida enda nyangka pemayuh orang ke seranta di Kuching,” ku tambah iya.
Berebak enggau nya Sekolah Rendah Kebangsaan Lodge mega bisi ngagih pemeri dalam barang ke berega RM4,100 nya sebengkah projek ke diatur Raban Nembiak Sekaut Kuching Ke-dua.
Seraya nya, Sekolah Menengah Kebangsaan Stampin mega enda ngelepaska awak ngundang Kelvin ngenataika licha.
Ungkup sekula di bandar raya Kuching ke bisi ati deka nemu silik agi bekaul enggau bungkur pengawa Hope Place tau besambung enggau Kelvin di arus 016-8660711.
Hope Place sebengkah gerempung ukai dikuasa perintah (NGO) ke ngembuan tuju nyadung bantu ngagai orang ke begunaka bantu baka barang ke dipeguna besehari-sehari ke diberi mensia mayuh ke ngembuan pementas.
Hope Place tau disambung di arus 013-5672775 ari pukul 8.30 pagi nyentuk ke 12:30 tengah hari maya Hari Satu ngagai Hari Lima.