Anda di sini

Penerang pasal ‘Antu Pala’ nya ngeringatka SADIA

Advertisement

Penulis nya patut mansik sereta betanya ari orang ke landik pasal pengawa nya, ku Sidi Munan

KUCHING: Chairman Sarakup Dayak Iban Sarawak (SADIA) Sidi Munan enda lantang ati enggau penerang ke dipansutka sebengkah surat kabar menua tu senentang ‘Antu Pala’.

Berebak enggau nya iya ngenataika pekara tu ngagai Utusan Borneo Hari Lima tu tadi, madahka pengerawan sereta pengeringat diri bekaul enggau penerang ke ditulis pasal pengawa ngintu ‘Antu Pala’ ke dipansut nengah artikel ‘Demi survival, ritual dan status’ kena 8 Februari 2014.

Ku iya, penerang ke salah bansa nya tau ngiring runding pemacha nyengkaum orang dagang temuai enggau nembiak sekula teulihka penemu ke salah.

“Penulis penerang nya patut betanya dulu ngagai orang ke amat nemu tauka landik ba pengawa ngintu ‘Antu Pala’,” ku iya.

Ba sukut info artikel nya madahka tiap 1 Jun, bansa Dayak deka ngatur pengawa ngintu ‘Antu Pala’ lalu penerang nya jauh bebida enggau pengawa ke dikereja kitai ba maya nya.

Sidi madah 1 Jun udah ditetap maya bansa Dayak ngintu Hari Gawai lalu enda bekaul enggau sebarang pengawa ngintu ‘Antu Pala’ munyi ke ditulis.

“Pengawa ngintu ‘Antu Pala’ semina dikereja maya kitai ngintu Gawai Antu tauka Gawai Kenyalang ke alai kitai mega masu tauka meri pengaruh makai,” ku iya.

Ngasuh penerang tu balat agi salah, orang keristin enda kala baptis ‘Antu Pala’…pengawa baptis semina dikereja ba orang ke agi idup, tandu iya.

Advertisement